Қозоғистон президенти Қосим-Жўмарт Тўқаев 9 май куни Россия пойтахти Москвада бўлиб ўтадиган Ғалаба парадида иштирок этмасликни режалаштирмоқда. Бу ҳақда президентнинг матбуот котиби Берик Уалига таяниб «ТАСС» хабар берди.
«Президент матбуот хизматига ОАВ вакилларидан Қосим-Жўмарт Тўқаевнинг Ғалаба кунига бағишланган Москвадаги парадда иштирок этишига изоҳ бериш илтимоси билан мурожаатлар келиб тушмоқда. Россия томонидан бундай таклиф берилмади, шунинг учун президентнинг жадвалида Москвага ташриф режалаштирилмаган», — деб ёзди матбуот котиби ўзининг Facebook саҳифасида.
Апрель ойининг охирида Россия президентининг матбуот котиби Дмитрий Песков ҳукуматнинг 9 май куни Москвада бўлиб ўтадиган Ғалаба паради учун чет эл давлатларининг раҳбарларига махсус таклифномалар юбормаганини маълум қилди.
2021 йилги мамлакатнинг асосий ҳарбий парадида 12 мингдан ортиқ одам, 190 дан ортиқ қурол-яроғ ва ҳарбий техника, шунингдек, 76 та учувчи қурилма — 53 та самолёт ва 23 та вертолёт иштирок этиши кўзда тутилган. Россия мудофаа вазири Сергей Шойгу парадга тайёргарлик доирасида ҳарбий қисмларда коронавируснинг тарқалишига йўл қўймаслик учун зарур чоралар кўрилишини буюрди.
Маълумот учун, Қозоғистон президенти Қосим-Жўмарт Тўқаев 19—20 май кунлари расмий ташриф билан Тожикистонга келиб, мазкур мамлакат раҳбари Эмомали Раҳмон билан музокаралар олиб боради.
Аввалроқ Тожикистон раҳбари Эмомали Раҳмон Иккинчи жаҳон урушидаги ғалабанинг 76 йиллигига бағишланган парад меҳмони сифатида Москвага ташриф буюриши маълум бўлди.
Параддан олдин Эмомали Раҳмон 8 май куни Россия президенти Владимир Путин билан музокаралар олиб бориши кутилмоқда. Россия президентининг матбуот котиби Дмитрий Песков давлат раҳбарлари Тожикистон ва Қирғизистон чегарасидаги вазиятни муҳокама қилишини айтди.
Изоҳ (0)