Россияда Иккинчи жаҳон урушида Германия устидан қозонилган ғалабанинг 75 йиллигига бағишланган ҳарбий парад 24 июнда бўлиб ўтади. Бу ҳақда президент Валдимир Путин «Россия 24» телеканали эфирида маълум қилган, деб ёзмоқда «РБК».
«Иккинчи жаҳон урушида фашизм устидан қозонилган ғалабанинг 75 йиллигига бағишланган ҳарбий парадни пойтахт Москва ва бошқа шаҳарларда ўтказиш тадбирларига тайёргарлик кўришни буюраман. Тадбирлар 24 июнда ўтказилади», — деган Путин.
Шунингдек, у парадга тайёргарлик кўриш ва уни ўтказишда хавфсизлик талабларига қатъий риоя этиш ҳақида ҳам кўрсатма берган.
«Тадбирларда иштирок этадиган одамларнинг хавфсизлигини таъминлаш юқори даражада бўлиши лозим», — деган Россия президенти.
Путин 16 апрелда короанвирус тарқалиши билан боғлиқ вазият сабаб 9 майда ўтиши лозим бўлган Ғалаба парадининг ўтказилишини кечиктирган, бироқ тадбирларнинг қайси санада ўтишига аниқлик киритмаганди. Кремлдаги «РБК» манбаларининг хабар қилишича, параднинг аввал бошидан 24 июнда ўтиши тахмин қилинган. Сабаби 1945 йилда Қизил майдондаги биринчи ҳарбий парад ҳам айна шу санада ўтказилган.
Президент администрациясидаги амалдорлардан бири карантиндан кейин параднинг ўтказилиши халқни руҳлантириши лозимлигини қайд этган.
«РБК»нинг қайд этишича, 24 июнда нафақат парад, балки Конституцияга ўзгартириш киритиш бўйича овоз бериш жараёни ҳам ўтказилиши мумкин. Ушбу сана дам олиш куни деб эълон қилинган, одамлар парадни томоша қилиши ва овоз бериши мумкин. 24 июнда фақат парад ўтказилса ва иш куни давом этса, одамлар байрам шукуҳини ҳис қилмаслиги мумкин ва ҳамма ҳам телевизор орқали тўғридан-тўғри трансляцияни кўра олмайди.
Конституцияга ўзгартириш киритиш юзасидан референдум 22 апрелда ўтиши лозим эди, аммо у ҳам коронавирус эпидемияси туфайли бошқа кунга қолдирилган. Ушбу тадбирнинг қачон ўтказилиши борасида ҳам аниқ маълумот берилмаган.
9 май куни Москва ва бошқа шаҳарларда байрам мушакбозликлари ўтказилган. Шунингдек, Россия пойтахтида ҳавода ҳарбий парад бўлиб ўтган. Россияда Ғалаба парадининг ўтказилиши Собиқ Иттиффоқ парчаланганидан кейин 1995 йилда Борис Ельцин президентлиги даврида бошланган ва шундан бери ҳар йили ўтказиб келинмоқда.
Изоҳ (0)