Анча салқин об-ҳаволи ҳафта ҳам якунига етмоқда. Биз ҳафта янгиликларини ўқувчилар учун сараладик. Дайжестни бошлаймиз.
Маълумки, Россия Федерацияси 9 май куни ўтказиши режалаштирилган ҳарбий парад коронавирус пандемияси сабабли 24 июнга сурилган эди. 1945 йилда ҳам ғалабанинг биринчи марказий паради 24 июнда ўтказилган. Ушбу тадбирда Ўзбекистон президенти Шавкат Мирзиёев ҳам иштирок этди. Таъкидланишича, бўлиб ўтган парадда 13 та давлатдан 225 та ҳарбий техника, 14 минг аскар ва офицер қатнашди.
Россия пойтахти осмонидан 55 самолёт ва 20 та вертолёт учиб ўтди. Москвадаги Ғалаба парадида Шавкат Мирзиёевдан ташқари бошқа давлат раҳбарлари ҳам меҳмон бўлди. Улар орасида Беларусь президенти Александр Лукашенко, Қозоғистон президенти Қосим-Жўмарт Тўқаев, Қирғизистон президенти Сўронбай Жээнбеков, Молдова президенти Игорь Додон, Тожикистон президенти Эмомали Раҳмон ҳам бор эди.
Шавкат Мирзиёев ташриф мобайнида Москва шаҳридаги «Номаълум аскар» ёдгорлигига гул қўйди. Москвадаги Ислом Каримов номи билан аталувчи хиёбонга бориб, у ердаги ўзбекистонликлар билан саломлашди ва устози Ислом Каримов пойига гулчамбар қўйди.
* * *
Ўзбекистонда коронавирусдан вафот этганлар сонини 20 нафар деб бермоқчи эдик. Бироқ бугун коронавирусга чалинган шифокор дунёдан ўтиши билан ўлимлар сони 21 тага етди. Сўнгги кунларда инфекция юқтирганлар сони ўса бошлаши билан ҳукумат карантин чораларини кучайтиришга киришди. Пойтахтда блокпостлар қайта тикланади. Мавжуд аҳвол ёмонлашаётганини ҳисобга олиб, Республика махсус комиссиясининг қарорига биноан, Тошкент шаҳрида коронавирус инфекцияси аниқланган «қизил» ҳудудларни блокпостлар ўрнатган ҳолда маҳалла, даҳалар ва кўчалар кесимида ёпилиши, карантинга олинган фуқароларнинг уйи олдида 24 соатлик навбатчилик ташкил этилиши белгиланди, деб ёзмоқда @davletovuz Telegram канали.
Яна бир янгилик шуки, чет элдан қайтганлар карантин назоратини меҳмонхоналарда ўтказиши мумкин. Коронавирус инфекцияси билан касалланиш ҳолатлари камаймаган давлатлардан Ўзбекистонга кириб келаётган фуқаролар ўз хоҳишига кўра 14 кунлик карантин муддатини давлат томонидан бепул таъминланадиган карантин марказларида ёхуд ҳақини тўлаган ҳолда меҳмонхонада ўтказиши мумкин бўлади.
27 июнь куни 255 кишида коронавирус аниқланди. Бешта ҳудудда аҳоли орасида касаллик қайд этилди. 27 июнь куни коронавирусдан кунлик тузалишлар сони бўйича ҳам рекорд ўрнатилди – 202 киши уйига кузатилди. 2020 йил 28 июнь соат 17:00 ҳолатига кўра, Ўзбекистонда коронавирус инфекцияси қайд этилганлар сони 7 813 нафарни ташкил этмоқда.
* * *
Ўзбек автомобиль бозорига немис ва чех машиналари кириб келмоқда. Бу борада президент қарори қабул қилинди. Қарорга кўра, биринчи босқичда 2020 йилдан тайёр Volkswagen ва Skoda’лар сотилади. Иккинчи босқичда 2022 йилдан Жиззахда автомобиль ишлаб чиқишга ўтилади. Қолаверса, мамлакатимизда Евро-5 стандартига жавоб берадиган 40 дан ортиқ автомобилларга ёнилғи қуйиш шохобчалари қурилади.
Хўш, Volkswagen Caddy ўзи қанақа автомобиль? Етти ва беш ўриндиқли бўлган ушбу йўловчи ва юк минивени ҳам бизнес юритишга, ҳам оилавий фойдаланиш учун тўғри келади. Тежамкор ва технологик (MPI) двигатель 1,6 литр қувватга эга, бензинда ишлайди. Ёқилғи сарфи – шаҳарда 100 километрга 9,3 литр, трассада 100 километрга 6,1 литр.
Бу янгилик «Ўзавтосаноат» монополиясидан халос бўлиш умидини уйғотмоқда. Албатта, ушбу заводнинг ҳам тақдири Peugeot-Citroen’ники каби бўлмаса.
* * *
Ўзбекистонда биофизика фанига асос солган академик Бекжон Тошмуҳамедов бу ҳафта 85 ёшида дунёдан ўтди. Бекжон Тошмуҳаммедов 1935 йил 27 январда Тошкентда ёзувчи Ойбек хонадонида туғилган. 1958 йилда Москва давлат университетини тамомлаган. Тошкент давлат университетида кичик илмий ходим, биокимё ва биофизика кафедраси доценти, Ўзбекистон ФА ядро физикаси ва биокимё институти биофизика лабораторияси мудири бўлиб ишлаган. Олий аттестация комиссияси раиси, Ўзбекистон ФА Президиуми аъзоси бўлган.
Бек Ойбекович АҚШ, Англия, Германия, Франция, Швеция, Дания каби мамлакатларнинг бир неча халқаро илмий марказ ва академияларининг фахрий аъзоси эди. Шунингдек, у 90-йилларда сиёсат билан ҳам шуғулланган. Шавкат Мирзиёев академик Бекжон Тошмуҳамедовнинг вафоти муносабати билан унинг оила аъзоларига таъзия билдирди.
* * *
27 июнь – Матбуот ва оммавий ахборот воситалари ходимлари куни. Одатда, бу куни журналистларни йиғиб тадбир ўтказилиши анъанага айланган. «Дарё» ўзбек журналистларининг иш жараёнидаги расмларини тўплаб чоп этди. Шавкат Мирзиёев матбуот ва ОАВ ходимларини касб байрами билан табриклади ҳамда Ўзбекистон журналистика ва оммавий коммуникациялар университети талабалари учун Маҳмудхўжа Беҳбудий номидаги стипендияни таъсис этишни таклиф қилди.
Президент нутқида айрим журналист ва блогерларимизда билим ва профессионал малака, баҳс маданияти етишмаслиги ҳақида ҳам тўхталди ҳамда «Биз бўлғуси журналистларимиз чуқур билим ва касб маҳоратини, она тилимиз билан бирга чет тилларни, фаол фуқаролик позициясини, ахборот-коммуникация технологиялари, нотиқлик малакасини пухта эгаллашларига алоҳида эътибор қаратишимиз зарур», деди.
«Дарё»да қолинг ва энг сўнгги янгиликлардан хабардор бўлинг. Карантин кучаймоқда, зарурий гигиена талабларига риоя қилинг.
Изоҳ (0)