Туркманистон пойтахти Ашхобод шаҳрида 9 май куни Иккинчи жаҳон урушида эришилган ғалабанинг 75 йиллиги муносабати билан ҳарбий парад ўтказилди, деб хабар беради «Хроника Туркменистана».
9 май тонгида мамлакат президенти Гурбангули Бердимуҳамедов, ҳукумат аъзолари, фахрийлар ва дипломатлар «Мангу олов» қаршисига гулчамбарлар қўйган. Шундан сўнг Туркманистон раҳбари Ашхободга келган Россия мудофаа вазири ўринбосари генерал-полковник Александр Фомин билан учрашган.
Фомин Бердимуҳамедовга Украина фронтининг 206-ўқчи дивизияси 748-ўқчи полкининг жанговар байроғини топширган. Ушбу полкда президентнинг бобоси — Бердимуҳамед Аннаев жанг қилган.
Кечга яқин эса «Халқ хотираси» мемориал комплексида Иккинчи жаҳон урушига тегишли ҳарбий техникалар паради бўлиб ўтган.
«Туркманистон ўзининг минглаб жасур ўғил ва қизларини Ватан озодлиги учун қонли жангга юбориб, шунингдек, фронт учун зарур бўлган маҳсулотларни ишлаб чиқариб ғалабага муносиб ҳисса қўшган», — дейди Бердимуҳамедов.
Президентининг таъкидлашича, Туркманистоннинг 70 мингдан ортиқ жангчиси турли медаль ва орденлар билан тақдирланган, 104 нафари Совет Иттифоқи Қаҳрамони номига сазовор бўлган, 15 нафари эса «Шон-шараф» орденининг тўлиқ кавалерига айланган.
Нашрнинг таъкидлашича, бу Туркманистон тарихида Ғалаба кунига бағишлаб ўтказилган илк ҳарбий парад ҳисобланади. Бунга қадар парадлар фақатгина Мустақиллик кунида ўтказилган. 2018 йилдан буён мамлакатда 9 май дам олиш куни ҳисобланмайди.
Мавзуга доир: Видео: Тошкентда 9 май мушакбозлиги
Изоҳ (0)