Тожикистон раҳбари Эмомали Раҳмон Иккинчи жаҳон урушидаги ғалабанинг 76 йиллигига бағишланган парад меҳмони сифатида Москвага ташриф буюради. Бу ҳақда президент матбуот хизматига таяниб, «РБК» хабар берди.
«Тожикистон президенти ва унинг ҳамроҳлари Душанбедаги Ғалаба боғида ўтказиладиган тантаналардан сўнг дарҳол Москвага жўнаб кетади ва у ерда Ғалаба кунининг 76 йиллигига бағишланган парадда қатнашади», — дейилади хабарда.
Параддан олдин Эмомали Раҳмон 8 май куни Россия президенти Владимир Путин билан музокаралар олиб бориши кутилмоқда. Россия президентининг матбуот котиби Дмитрий Песков давлат раҳбарлари Тожикистон ва Қирғизистон чегарасидаги вазиятни муҳокама қилишини айтди.
«Музокараларни режалаштиряпмиз. Албатта, чегарадаги вазиятга тўхталиб ўтилади», — деди Песков.
Қайд этилишича, Қирғизистон президентининг Москвага ташрифи режалаштирилмаган.
Маълумот учун, Россияда бу йил Ғалаба паради 9 май куни одатдаги форматда Қизил майдонда бўлиб ўтади. Бироқ Кремль парадга чет эллик давлат раҳбарларини таклиф қилмаслигини айтди, чунки тадбир юбилей санасида ўтказилмайди. Ғалаба паради илк бор 1945 йил 24 июнда бўлиб ўтган.
2020 йилда ҳам коронавирус таҳдиди туфайли парад 24 июнга қолдирилган эди. Ўшанда Ўзбекистон, Қозоғистон, Қирғизистон, Абхазия, Беларусь, Молдова, Сербия, Тожикистон, Жанубий Осетия раҳбарлари Қизил майдон трибуналарида меҳмон бўлган.
Аввалроқ Қозоғистон президенти Қосим-Жўмарт Тўқаев 19—20 май кунлари расмий ташриф билан Тожикистонга келиб, мазкур мамлакат раҳбари Эмомали Раҳмон билан музокаралар олиб бориши ҳақида хабар берилганди.
Эслатиб ўтамиз, Шавкат Мирзиёев Тожикистон президенти Эмомали Раҳмоннинг таклифига биноан 10−12 июнь кунлари расмий ташриф билан Душанбеда бўлади.
Изоҳ (0)