Ўзбекистон Президенти Шавкат Мирзиёев Иккинчи жаҳон урушида қозонилган ғалабанинг 75 йиллигига бағишланган парадда иштирок этди. Бу ҳақда Президент матбуот хизмати хабар берди.
Президент матбуот хизматининг қайд этишича, бу йил Россия пойтахти Москва шаҳрида ғалабанинг 75 йиллигига бағишланган тантанали тадбир 9 май куни ўтказилиши режалаштирилган эди. Аммо коронавирус пандемияси сабабли уни ташкиллаштириш кейинги муддатларга сурилди. 1945 йилда ғалабанинг биринчи марказий паради 24 июнь санасида ўтказилгани боис 2020 йил ҳам бундай тантана учун айнан шу кун танланди.
Масалан, сўнгги пайтларда олиб борилган тадқиқотлар натижасида Ўзбекистондан 2 миллионга яқин киши урушга сафарбар этилгани аниқланди. Фронт ортида ҳам ўзбекистонликлар кўрсатган матонат келажак авлодларга чексиз фахр ва ифтихор бағишлайди.
Шу боис мамлакат вакиллари ғалабанинг 75 йиллик шонли санаси муносабати билан Москва шаҳрида ўтказиладиган тантанага таклиф этилди», — дейилади хабарда.
Таъкидланишича, пандемия бутун дунёга ўз таъсирини кўрсатаётган ҳозирги оғир шароитда Ўзбекистон Президентининг бундай тадбирда иштирок этишининг ўзи аждодларга хос қаҳрамонлик ифодасидир. «Экспертлар фикрига қараганда, мустақил Ўзбекистон Президентининг илк бор қатнашиши параднинг нуфузини сезиларли даражада оширади», — дейилади Президент матбуот хизмат хабарида.
Қайд этилишича, Ўзбекистон ҳарбийлари ҳам мазкур тадбирда мамлакат мустақилликка эришганидан кейин биринчи бор иштирок этди.
«Мамлакатимиз раҳбари Москванинг Қизил майдонида бўлиб ўтган тантанали тадбирда ўз иштироки билан Ўзбекистон элининг шонли Ғалабага эришишдаги умум эътироф этилган буюк хизматига ҳурмат бажо келтирди», — дейилади хабарда.
Таъкидланишича, бўлиб ўтган парадда 13 та давлатдан 225 та ҳарбий техника, 14 минг аскар ва офицер қатнашди. Россия пойтахти осмонидан 55 самолёт ва 20 та вертолёт учиб ўтди.
Эслатиб ўтамиз, Ўзбекистон Президенти Шавкат Мирзиёев мазкур парадда қатнашиш учун 23 июнь куни Москвага етиб борди. Шу куни Шавкат Мирзиёев Россия президенти Владимир Путин билан учрашди. Россия президенти Ғалаба парадига келгани учун Шавкат Мирзиёевга миннатдорчилик билдирди.
Аввалроқ мазкур парадда иштирок этиш учун Москвага борган Қирғизистон делегацияси аъзолари орасида коронавирус аниқлангани ҳақида хабар берилганди, Шу сабабли, Қирғизистон президенти Сўронбой Жээнбеков парадда иштирок этмади.
Маълумот учун, Владимир Путин Москвада ўтган Ғалаба парадига барча МДҲ давлатлари раҳбарларини таклиф қилган. Озарбайжон президенти Илҳом Алиев, Арманистон бош вазири Никол Пашинян мамлакатларидаги эпидемиологик вазият туфайли, Туркманистон президент Гурбангули Бердимуҳамедов 29 июнда 63 ёш — Пайғамбар ёшига тўлиши сабаб тантанали тадбирларга бора олмаслигини эълон қилган. Қозоғистоннинг биринчи президенти Нурсултон Назарбоев эса коронавирус юқтириб олган ва у ҳам Москвага бормаган.
Изоҳ (0)