“Пахтакор” клуби президенти маслаҳатчиси Максим Шацких Қозоғистоннинг “Sports24.kz” нашрига берган интервьюсида Ўзбекистон терма жамоасининг 2026 йилги Жаҳон чемпионатига чиқиш имкониятлари ҳақида фикр билдирди.
Ўзбекистон терма жамоаси июнь ойида саралашнинг сўнгги икки баҳсини ўтказади. Улар дастлаб БАА билан сафарда ўйнаса, 10 июнь куни Қатарни Тошкентда қабул қилади.
Кўп гапиришга ҳожат йўқ — ЖЧ-2026 йўлланмасини қўлга киритишга жуда яқинмиз. Ярим қадам қолди дейиш мумкин, лекин олдинда энг оғир, энг мураккаб ўтадиган баҳслар турибди. Ишонаманки, биз буни уддалай оламиз. Бўлажак ўйинларда муаммо бўлмаслигига умид қиламан. Агар БААга қарши дуранг натижа қайд этилса, биз Жаҳон чемпионатига чиқамиз, деди Шацких.
Маълумот учун, А гуруҳида Эрон 20 очко тўплаган ҳолда муддатидан олдин мундиал масаласини ҳал қилди. Ўзбекистон терма жамоаси 17 очко билан 2-ўринни эгаллаб турибди. Уларнинг асосий рақобатчиси БАА ҳисобида 13 очко мавжуд ва улар 3-поғонадан жой олган.
Изоҳ (0)