Рақамлар сўзлаганда: Ўзбекистон — Сингапур қарама-қаршилигида устунлик ким томонда?

Ўзбекистон миллий терма жамоаси Саудия Арабистонида марказлашган тизимда бўлиб ўтаётган ЖЧ—2022 саралашидаги иштирокини бошлайди (давом эттиради). Вадим Абрамов жамоаси 7 июнь куни Сингапурга қарши баҳс олиб боради. Учрашув Тошкент вақти билан 23:00 да бошланади.

Ўзаро ўйинлар тарихи

Шу вақтга қадар жамоалар расмий ўйинларда ўзаро уч бор тўқнаш келган. Уларда «оқ бўрилар» юз фоизлик натижа қайд этган. ЖЧ—2010 саралаш босқичи доирасида 2008 йили Сингапур Тошкентдаги ўйинда Александр Гейнрихнинг ягона голи эвазига таслим этилган. Сафардаги баҳсда Ўзбекистон 7:3 ҳисобида ғалаба қозонган. Голларга Сервер Жепаров (2 марта), Виктор Карпенко, Темур Кападзе, Азиз Ибрагимов, Виталий Денисов ва Максим Шацких муаллифлик қилган.

Мазкур саралаш босқичининг биринчи даврасида Ўзбекистон меҳмонда сингапурликларни 3:1 ҳисобида таслим этганди. Элдор Шомуродовнинг дубли ва Одил Аҳмедовнинг аниқ зарбаси Абрамов жамоасига уч очко тақдим этганди.

Гуруҳдаги ҳолат

Мазкур ўйинда Ўзбекистонни ғалабадан бошқа натижа қониқтирмайди. КХДРнинг мусобақани тарк этишидан кейин ФИФА қабул қилган қарор бўйича энг яхши иккинчи ўрин эгаларининг гуруҳдаги сўнгги жамоа билан ўйинлардаги натижаси бекор қилинади.

Айни дамда Ўзбекистон терма жамоаси 5 ўйинда 9 очко тўплаган ва битта кўп учрашувда қатнашган Саудиядан (14) 5 очко ортда қолмоқда. Саудия Арабистони билан ўйин қийин кечишини инобатга оладиган бўлсак, Сингапур ва Яманга қарши ўйинларда очко йўқотиш фожиага тенг бўлади.

Ярим ҳимоя ва ҳужумдан кўнгил тўқ, аммо...

Абрамов билан Саудия Арабистонига йўл олган таркиб ҳақида гапирсак. Ярим ҳимоя ва ҳужумда ҳаммаси жойида. Ушбу позицияда тўп сурадиган легионерлар ва уларни ўрнини боса оладиган ёш иқтидорлар етарли даражада.

Бироқ ҳимоя ва дарвозабон чизиғи ҳақида бундай деб бўлмайди. Ҳозирги вақтда марказий ҳимоя жуфтлигида кимлар ҳаракат қилишини айтиб бериши қийин. Абрамов тажрибали марказий ҳимоячилардан фақат Тўхтахўжаевни олди. Катта эҳтимол билан Ашурматов, Қобилов, Алиқулов ва Эшмуродовдан бири Исломга шерик бўлади. Сингапурга қарши биринчи даврадаги баҳсда Тўхтахўжаев—Ашурматов жуфтлиги ҳаракат қилганди.

Тахминий таркиб

Қайд этиш керак, ушбу босқич якунида тўплар нисбати ҳам муҳим аҳамият касб этиши мумкин. Шундан келиб чиқиб, Абрамов бу ўйинга ҳужумкор таркибни ташлашини тахмин қилиш мумкин.

Ўзбекистон: Абдувоҳид Неъматов, Ҳожиакбар Алижонов, Рустам Ашурматов, Ислом Тўхтахўжаев, Иброҳимхалил Йўлдошев, Отабек Шукуров, Одил Ҳамробеков, Одил Аҳмедов, Жалолиддин Машарипов, Достон Ҳамдамов, Элдор Шомуродов.