Ўзбекистонлик иқтидорли ярим ҳимоячи ФИФАга оиласи, тажрибали футболчилардан ўрнак олиши ва Олимпия ўйинларидаги мақсадлари ҳақида гапирди.
Диёр Холматов 2002 йилда туғилганида Оксана Чусовитина аллақачон Олимпия олтин медали, бир неча бор жаҳон чемпиони унвонлари ва бошқа қатор мукофотларни қўлга киритган эди.
Чусовитина тўққизинчи Олимпиадага йўлланмани қўлга киритишни мақсад қилган, Холматов эса ўз саёҳатининг бошида турибди. Шу ойда бўлиб ўтадиган ОФК U23 Осиё Кубоги финал босқичига тайёргарлик кўраётган 21 ёшли футболчи ФИФА нашрига Париж—2024да Ўзбекистон байроғи остида Олимпиадада қатнашиш унинг учун шараф эканлигини айтиб ўтди.
“Олимпиадада Ўзбекистон спортчиларини кўриш ва улар билан Парижга бориш туйғуларини биргаликда туйиш жуда ҳаяжонли бўларди. Ўзбекистонда кўплаб спорт турларида медаллар учун кураш олиб борадиган таниқли спортчилар бор, айниқса Оксана Чусовитина. У нафақат мамлакатимиз, балки жаҳон миқёсида бадиий гимнастика афсонаси ҳисобланади. У биринчи марта 1992 йилда Олимпиада ўйинларида қатнашган ва бўлажак Олимпиада унинг учун тўққизинчиси бўлади! Унинг профессионаллиги, чидамлилиги ва спортдаги узоқ фаолияти ҳамма учун ўрнак”.
Холматов ҳатто уйда, профессионал футболчи бўлган отаси Акмал Холматовдан илҳом олади. Ота ва ўғил ҳам 16 карра Ўзбекистон чемпиони бўлган “Пахтакор” жамоаси билан фаолиятини боғлаган.
“Мен “Пахтакор” футбол клуби тарбияланувчисиман ва айнан шу ердан менинг футболдаги фаолиятим бошланди. Гарчи мен Лионель Месси ва бошқа кўплаб ўйинчиларнинг фаолиятидан руҳлансамда, отам мен учун асосий намуна бўлиб қолади. У ҳам “Пахтакор”да ўйнаган ва унинг рақами ҳам меники каби 8 эди. Биз ҳатто бир хил позицияда ўйнаймиз!”
Ёшлар миқёсида Ўзбекистон термаси сўнгги йилларда кучайиб бормоқда, жамоа ўтган йили ФИФА U17 Жаҳон чемпионатида чорак финалга ва аввалги U20 Жаҳон чемпионатида 1/8 финалга қадар етиб борди. Ҳозиргача Олимпиадага қатнашиш учун бўлган 7 уриниш муваффақиятсиз бўлса-да, Холматов бу вазиятни ўзгартиришга қарор қилган.
“Ўзбекистоннинг Олимпия ўйинларидаги дебюти барчамиз учун жуда муҳим, — деди у. Биз бу орзуни рўёбга чиқариш учун бор куч-ғайратимизни кўрсатишга аҳд қилганмиз. Ўзбекистон халқи футболни яхши кўради ва миллий терма жамоани жуда ҳиссиётлар билан қўллаб-қувватлайди, бизнинг муваффақиятимиз барча учун катта ғурур ва бахт манбаи бўлиши шубҳасиз”.
Холматов ўзбек истеъдодининг олтин авлод вакилларидан бири бўлиши мумкин. Марказий ярим ҳимоячи ҳужумга ёрдам берувчи ёки таянч ярим ҳимоясида ўйнашга қодир футболчи бўлиб, таркибида “Ланс” ҳимоячиси Абдуқодир Ҳусанов, Аббосбек Файзуллаев ва Жасурбек Жалолиддиновлар бор жамоанинг калит ўйинчисига айланиши мумкин. Холматовнинг сўзларига кўра, айрим футболчиларнинг U23 Осиё Кубогида иштирок этиши ҳозирча ноаниқ бўлса-да (интервью олинган пайтда легионер футболчиларнинг иштироки ҳали тасдиқланмаган эди), улар Олимпиадада иштирок этиш учун бор имкониятларини ишга солишга тайёр.
“Олимпиадага бориш бебаҳо тажриба ва ўзимизни юқори даражада кўрсатиш имконияти ҳисобланади. Токиодаги ўйинларда Испания ва Бразилия терма жамоалари ўртасидаги финал ўйинида бразилияликлар қўшимча бўлимларда 2:1 ҳисобида ғалаба қозонганини, айниқса Малкомнинг захирадан майдонга тушиб ғалаба голини урганини ҳалигача ёрқин хотираларимда сақлаб қолганман.
Олимпиадага чиқиш учун U23 Осиё Кубогида яхши иштирок этишимиз керак ва биз бунга тўлиқ тайёрмиз. Биз бу борада тўрт йилдан бери ишлаяпмиз ва максимал имкониятларимизни намойиш этамиз. Рақибларимиз ҳам турнирга тайёргарлик кўрганини тушунамиз, аммо биз ўз кучимизга ишонамиз ва ҳар қандай жамоага қарши ўйнашга тайёрмиз”.
Холматов ўзининг бир неча ўзбек афсоналари Максим Шацких ва Тимур Кападзе қўл остида клуб ва миллий терма жамоа доирасида ишлаш имконига эга бўлганини айтди.
“Мени ёшлигимдан таниқли мураббийлар тарбиялаган. “Пахтакор”да асосий таркибга кирганим учун Шота Арвеладзе ва Максим Шацких билан ишлаш бахтига муяссар бўлдим. Уларнинг иккаласи ҳам ўз мамлакатларида даврининг энг яхши ўйинчилари эди ва мураббий бўлиш орқали ўзларининг қимматли тажрибаларини футболчиларга ўргатади”.
Энди 23 ёшгача бўлган жамоада биз билан Тимур Кападзедек мураббий бўлиши ҳар қандай футболчининг орзуси. У ёш иқтидорлар билан ишлашни, футболчиларнинг салоҳиятини очиб беришни биладиган зўр мутахассис. Кападзе мен билан бир хил позицияда ўйнаган, шунинг учун у менга жуда кўп муҳим маслаҳатлар беради”.
Европанинг етакчи клублари томонидан кузатилаётган Холматов ўзининг фаолияти чўққиси сари саёҳати ҳақида фикр юритар экан, Ўзбекистон нега техник жиҳатдан жуда кўп иқтидорли ўйинчиларни етиштириш бўйича тажрибага эга эканлигини тушунтирди.
“Ўзбекистон ҳар доим иқтидорли футболчиларни етиштирган ва етиштиришда давом этмоқда. Ёш футболчиларнинг муваффақияти уларнинг тинимсиз меҳнати, маҳоратини ошириши, ўз олдига қўйган мақсадларига эришишдаги чексиз иштиёқида сабабдир. Мураббийларимиз бу борада футболчиларга ёрдам беришга доим тайёр.
Болалигимга келсак, мен жуда кўп футбол ўйнаганман — ҳам “Пахтакор” академиясида, ҳам бўш вақтларимда, кўчада дўстларим билан футбол ўйнашни севардим. Отамнинг ўйинларига гувоҳ бўлганим менинг ҳам юқори даражага чиқишимга сезиларли таъсир кўрсатди.
Мен ёш футболчи учун имкон қадар тўп билан ишлаш, жисмоний ривожланиш, тактикани ўрганиш ва футбол ҳақида билимларини ривожлантириш жуда муҳимлигига қатъий ишонаман”,— дейди “Пахтакор” ярим ҳимоячиси Диёр Холматов.
Изоҳ (0)