“Ўзбек Марадонаси”дан ҳақиқий ватанпарваргача: Ўзбекистон миллий терма жамоаси сардорлари ҳақида (видео)

Ўзбекистон миллий терма жамоаси CAFA Nations Cup 2023 турнири финалида Эронга имкониятни бой берди. Лекин финалга қадар босиб ўтилган йўлда, терма жамоа сардори Элдор Шомуродов ҳақиқий лидерлик сифатларини намойиш этди. Умуман сардорларда етакчилик, катта масъулият бўлиши лозим. Бугун Ўзбекистон терма жамоасининг барча даврлардаги сардорларини ёдга олинади.

Миржалол Қосимов

“Ўзбек Марадонаси” деб ном берилган Миржалол Қосимов фаолиятини 2006 йилда якунлаган бўлса-да, футбол мухлислари ҳамон унинг майдондаги бетакрор ҳаракатларини қўмсашини таъкидлаб келади. Буни тушуниш мумкин, боиси ўтган вақт давомида мамлакатда бир ўзи ўйин тақдирини ҳал қила оладиган ва жамоадошларини ўз орқасидан етаклайдиган ўйинчилар етишиб чиққани йўқ деб айтиш нотўғри бўлмайди. Қосимов даврида стандарт вазиятлар терма жамоанинг энг катта устун томони эди. Қосимов уларни шу қадар аниқлик ва нафислик билан амалга оширар эдики, ҳатто дарвозабонлар ҳам унинг зарбаларига шунчаки маҳлиё бўлиб қоларди. Шунингдек, у майдон марказидан туриб, бутун бир ўйинни назорат қилиб турарди. Унинг заргарона узатмаларидан сўнг гол уришдан кўра гол ура олмаслик қийинроқ эди.

Қосимов буцаларини михга илгач, мураббийлик фаолиятини бошлади. У қисқа вақт мобайнида “Бунёдкор” ва терма жамоани бошқариб, қониқарли натижаларга эришди деб айтиш мумкин. Миржалол Қосимов ҳозирда Олмалиқнинг “ОКМК” жамоасига устозлик қилмоқда. Унинг терма жамоадаги статистикаси қуйидагича бўлган: 67 ўйин, 31 гол.

Максим Шацких

Ҳозирда “Пахтакор” бош мураббийи бўлган Шацких Ўзбекистон миллий терма жамоаси тарихидаги энг яхши тўпурар эди. Яқиндагина Элдор уни ортда қолдирди. Максим терма жамоада 20 ёшида дебют қилиб, 60 ўйинда 34 та гол урган. Унинг майдондаги устун томонлари сифатида гол сезиш қобилияти ва иккинчи қаватда яхши ўйнай олишини кўрсатиш мумкин эди. Шацких гарчи терма жамоага узоқ вақт давомида сардорлик қилмаган бўлса-да, ҳар доим ўз ўрнига эга бўлиб келган. 

Сервер Жепаров

Сервер Жепаров ҳам узоқ йиллар давомида Ўзбекистон миллий терма жамоасига сардорлик қилган ва жамоанинг энг муҳим ўйинчиларидан бири бўлган. Икки бор Осиёнинг энг яхши футболчиси (2008 ва 2011 йилларда) деб топилган Жепаров майдон марказида ўйиннинг боришини назорат қиларди ва ақлли паслари билан ҳужумчиларни қулай вазиятларга олиб чиқарди. 

Айтарлик ҳеч қандай (катта) натижага эришмаган бўлса-да, Жепаровнинг ҳам термадаги фаолиятини қониқарли баҳолаш мумкин. 

Одил Аҳмедов

Одил Аҳмедов терма жамоа тарихидаги энг ёрқин футболчилардан бири ҳисобланади. Аҳмедов ҳар доим майдонда фидойилиги ва ўзини аямаслиги билан ажралиб турган. У ўзи майдонга тушган ўйинларнинг ҳеч бирида шунчаки ҳаракат қилмаган, балки ҳақиқий жангчи сифатида майдоннинг ҳар бир қарич ери учун курашган. Ва айнан шунинг учун уни барча мухлислар бирдек қадрлаган. Ўзбекистон 2022 йилда Қатарда бўлиб ўтган Жаҳон Чемпионати йўлланмасини қўлдан чиқарганидан сўнг Одил терма жамоадаги фаолиятини якунлади. 

Элдор Шомуродов

Ҳозирда “Рома” шарафини ҳимоя қилаётган Элдор Шомуродов терма жамоанинг етакчи футболчиларидан бири. 27 ёшида Ўзбекистон терма жамоасининг энг яхши тўпурарига айланди. 66 ўйинда 37 та гол. 

Шомуродов сардорлигида Ўзбекистон терма жамоаси CAFA Nations Cup—2023 финалига қадар етиб борди. Финалда Эронга имконият бой берилди.