Футбол бўйича Ўзбекистон Суперкубоги учрашуви 29 май, чоршанба куни бўлиб ўтади.
Унда “Пахтакор” ва “Насаф” жамоалари ўзаро тўқнаш келади. Учрашув олдидан жамоалар мураббийлари иштирокида матбуот анжумани ўтказилди.
-FGFmaBE-.jpg)
Эртага ҳужум қилишни ёқтирадиган икки клуб баҳслашади. Қолаверса, стадион ҳам ажойиб ҳолатда. Эртага стадионга анча мухлис келса керак. Биз эса, ўз навбатида уларга ёқадиган футбол намойиш этишга интиламиз.
Суперкубок — мавсум давомида ўйналадиган учта совриндан бири. Чемпионат, Кубок ва Суперкубок. Бу совринларнинг аҳамияти бор. Шунчаки, оддий бир баҳсдек қарамаяпмиз. Ютишни истаймиз. “Бунёдкор” стадионида ҳали фаолиятида футбол ўйнамаган ўйинчиларимиз бор. Улар учун ҳам жуда муҳим баҳс ва бу улар учун биринчи соврин бўлиши мумкин. Боримизни берамиз ва совринни ютишга ҳаракат қиламиз. Умид қиламанки, эртага стадионда мухлисларимиз бизни ёлғизлатиб қўйишмайди.
Тарих билан яшамаймиз. Эртага янги кун ва янги ўйин. Рақиб билан олдинги ўйинлардаги статистика хатто эсимда ҳам йўқ. Бу борада умуман ўйламаяпмиз. Эртага фақат ғалаба учун ўйнаймиз.
Агар “Насаф”да муаммолар бор дейилса, унда мен ўз муаммоларимиз ҳақида гапирмай қўяқолай. Биз мавсум бошидан буён муаммолар билан курашаяпмиз. Агар, биз ўйинлар давомида яратаётган вазиятларимизни кўрсангиз буни тушунишингиз мумкин. Агар биз ушбу вазиятларнинг ярмидан фойдалана олганимизда пешқадам бўлардик. Мана, ёнимда ўтирган Достон Ҳамдамов тўпурар бўларди. Чунки у яратилаётган вазиятлар бўйича чемпион.
Дарвозада ким туришини эртага билиб оласиз. Яхши тайёрландик, футболчилар қандай рақиб билан ўйнаётганини билади. Ёшларга кўп умид билдиряпмиз. Албатта, ёшлар барақарор ўйнашмайди. Бу барча ёшларда муаммо. Улар ҳам ўйин даражасини ҳис қилишяпти.
Умид қиламанки стадионга анча мухлислар келади. Вақт ажратиб, оиласи билан келиб жамоаларни қўллаб-қувватлаб туришади. Биз эса, уларга ёқадиган, уларни хурсанд қиладиган ўйин намойиш этишга ҳаракат қиламиз.
Максим Шацких, “Пахтакор” бош мураббийи
-ZdlMMSzr.jpg)
Тайёргарликни Қаршидаги қароргоҳимизда олиб бордик. Тошкентга бугун этиб келдик. Рақиб сафидаги футболчилар ҳақида етарлича тушунтириш бердик. Чиройли ўйин кўрсатиб, мухлисларни хурсанд қилишга ҳаракат қиламиз.
Кубок баҳсларидан чиқиб кетганимиз биз учун анча оғриқли бўлди. Мухлисларимиз олдида ҳам анча уятга қолдик. “Навбаҳор”га мағлуб бўлганимиздан кейин анча тушкун вазиятга тушиб қолдик. Иккита сафар ўйинида ижобий натижа кўрсата олмадик. Бунинг ўзига яраша сабаблари бор албатта. Буни футболчилар ҳам билади. Қанчалик оғриқли бўлмасин, буни қабул қилишимиз керак. Олдимизда бошқа катта мақсадлар бор. Шу мақсадларга эришиш учун ҳаракат қиламиз.
Албатта, ўйин олдидан анча муаммоларга дуч келдик. Уч нафар марказий ҳимоячимиз йўқ. Уларнинг ўрниларини бошқа позициядагилар билан тўлдиришга мажбурмиз. Умид қиламанки, улар эртага ишончни оқлай оладилар.
Бу ўйинга футболчиларни руҳлантириш шарт эмас. Битта ўйиндан иборат финал дейиш мумкин. Олдинги ўйинлардаги натижаларимизни эсдан чиқариш мумкин. Аммо, бундай ўйинлар доим эсда қолади. Буни футболчилар ҳам жуда яхши билишади. Аммо, шундай бўлсада буни футболчиларга тушунтиришга ҳаракат қилаяпмиз.
Ҳозир футболда шундай тенденция пайдо бўлди. Замонавий футболда натижа муҳим бўлиб бораяпти. Шунинг учун баъзида ҳужумкорликдан ҳимоявий футболни афзал кўрамиз. Ҳатто, “Реал” ҳам керак бўлса ҳимояда ўйнаяпти. Бу футбол.
Қайсидир мураббийга қарши алоҳида тайёргарлик кўрмайман. Шацких билан ўзаро статистикам яхши бўлиши мумкин. Аммо, буни ҳозир ўйламаяпман. Драган Черанни яхши биламан. Буни кеча машғулотлар пайтида футболчилар билан гаплашгандик. Рақиб жиддий. Бизга қарши бошқача мотивация билан ўйнайди. Бошқа ўйинларда улар яхши натижа кўрсата олмаётган бўлишлари мумкин. Аммо, “Насаф”га қарши бошқача “Пахтакор”ни кўриш мумкин. Битта ўйинга “Пахтакор” бемалол футболчиларни руҳлантира олади.
Футболимиз даражаси ўсиб бормоқда. Ўйин сифати ҳам анча ошди. Стадионларга мухлислар ташрифи анча ошган. Бу қувонарли ҳолат, албатта. Жамоаларнинг савияси ўсгани яққон билинаяпти. Қизиқарли ўйинлар сони кўпайди. Ўйлайманки, эртага ҳам стадионга кўплаб мухлислар келади.
Рўзиқул Бердиев, “Насаф” бош мураббийи
Эслатиб ўтамиз, Суперкубок учрашув 29 май куни 19:00 да старт олади.
Изоҳ (0)