Максим Шацких: ФИФА кунларидан ташқари вақтда «Пахтакор» футболчиларини безовта қилмасликларини хоҳлайман

«Пахтакор» жамоасининг янги бош мураббийи Максим Шацких илк бор матбуот анжуманида иштирок этди ва бир қатор саволларга жавоб берди.

Суперлига ҳақида

Чемпионат даражаси халқаро майдон орқали белгиланади. Лекин рақобат жиддий кечмоқда. Чемпионлик учун курашадиган жамоалар кўпайган. Демак, ҳаммаси тўғри йўлда кетмоқда. Умуман олганда, ҳар йили чемпионатни кузатиб келганман ва ҳаммаси жойида деб ўйлайман.

Бош мураббийлик таклифини ўйлаб ўтирмасдан қабул қилгани ҳақида

Клубга спорт директори сифатида келгандим. Бу мен учун янги иш, янги йўл эди. Кейинроқ «Пахтакор» Войнески билан хайрлашди ва мени бош мураббийликка таклиф этди. Болаликдан шу ерда ўйнаганим боис таклифга розилик бердим. Чет элга айнан «Пахтакор»дан йўл олганман. Бундай таклиф устида ўйланиб ўтирилмайди.

Клубдаги рақобат ҳақида

Иложи борича ҳар бир чизиқни кучайтириш лозим, чунки рақобат бўлиши керак. Рақобат бўлмаса, ўсиш бўлмайди. Ҳар бир позицияда икки нафардан футболчи бўлиши керак. Шунда ривожланиш бўлади ва футболчилар ҳам борини бериб ўйнайди. Агар рақобат бўлмаса, руҳий жиҳатдан қийинчилик юзага келади. Яна харидлар бўлади, албатта. Бизда юқори даражали футболчилар бўлиши керак.

«Пахтакор»дек клуб ҳар бир футболчиси билан ҳар йили шартномани 1 йилга узайтиравериши ярашмайди. Биз камида 2 ёки 3 йиллик келишувни расмийлаштиришни йўлга қўймоқдамиз.

«Эски мактаб» ва замонавий футбол борасида

Ҳозир бошқа авлод ўйнамоқда. Мен Лобановский даврида ўйнаган футбол бўлмайди. Чунки футбол ҳам бошқа йўналишда ривожланиб кетди. Ҳозир олдингидек оғир юкламалар берилмайди. Илгари авлод бошқа эди, экология бошқача эди. Ҳозирги кунда футболчи ҳар қандай позицияда ўйнашга мослашиши керак.

Тан олиш керак, экологик вазият ва овқатланиш тартиби ўзгариб кетди. Катта шаҳарларда машиналар кўп бўлади. Бу ҳам катта муаммо ва ҳамма жойни муаммоси. Шу ва бошқа сабаблар хоҳлайсизми-йўқми, албатта, таъсир кўрсатади. Футбол атрофидаги инфратузилма ҳам ўзгарган. Ҳозир футболчи машғулотга келади, унга ҳамма нарса муҳайё этилади, биз ўйнаган даврда бундай эмасди. Бироқ бунга секин-аста мослашиб борамиз. Бизда яхши футболчилар йиғилган, жамоамиз жуда аҳил.

Мухлислар ҳақида

Ҳақиқий мухлислар ҳамиша сиз билан бирга бўлишади. Ҳеч бир мураббий ҳар доим ғалаба қозонмайди. Мағлубиятсиз ғалаба ҳам бўлмайди. Мухлисларга келсак, бундан чўчимайман. Раҳбарият ва мухлислар фақат ғалабани кутишларини биламан. Агар назорат қўлимдан чиқиб кетса, жамоада бўлмайман, бу аниқ. Мухлислар шунчаки ишдан ташқари, 2 соатга келиб, жамоани қўллаб-қувватлаб турса, ҳаммаси зўр бўлади. Уларга ёқадиган ва завқ оладиган футбол кўрсатишга интиламиз.

Янги футболчилар ҳақида

Ҳамма нарсанинг ўз вақти бўлади. Янги футболчиларни очиқлай олмайман, тўғри тушунинг. Лекин тез орада билиб оласиз.

«Пахтакор» футболчиларининг терма жамоага жалб қилиниши ҳақида

Мен «Пахтакор» бош мураббийиман. Терма жамоа ҳақида ўйлаётганим йўқ. Албатта, улар учун қайғураман. Менда ҳозир термага нисбатан битта кичик эътироз бор: биласиз, «Пахтакор» Ўзбекистон терма жамоаси асосини ташкил қилади. Шундай экан ФИФА кунларидан ташқари бошқа пайтда футболчиларимизни безовта қилмасликларини хоҳлаган бўлардим.

Максим Шацких, «Пахтакор» бош мураббийи