Андижон вилоятининг Хонобод шаҳри, Тошкент вилоятининг Қуйи Чирчиқ тумани, Қашқадарё вилоятининг Яккабоғ тумани ҳамда Хоразм вилоятининг Гурлан туманларида валюта қимматликлари савдоси билан шуғулланиб келган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Хонобод шаҳрида фуқаро Э.Р. фуқаро А.Т.га 3 минг долларни 38,7 млн сўмга сотган вақтида ушланди. Тезкор тадбирда 3 минг доллар, 35 950 рубль ва 3 минг қирғиз соми ашёвий далил сифатида олинган.
Шунингдек, Қуйи Чирчиқ туманида фуқаро М.А. фуқаро У.Б.га 1,9 минг долларни 24,7 млн сўмга, 83 800 рублни 12,9 млн сўмга ва 485 500 тенгени 13,1 млн сўмга сотган вақтида ушланган.
Шу билан бирга, Яккабоғ туманида фуқаро А.А. фуқаро М.Х.дан 3,5 минг долларни 45,1 млн сўмга сотиб олган вақтида ушланган.
Бундан ташқари, Гурлан туманида фуқаро А.К. “Гурлан деҳқон бозори” АЖ олдида фуқаро М.Х.дан 350 минг рублни 52 млн сўмга сотиб олган вақтида ушланган.
Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.
Қўлга олинаётган “валютчик”лар
Бухоро, Хоразм ва Тошкент вилоятларида валюта қимматликлари савдоси билан шуғулланиб келган шахслар ушланган эди. Шунингдек, Андижон вилоятининг Балиқчи ҳамда Олтинкўл, Бухоро вилоятининг Пешку туманида валюта қимматликлари савдоси билан шуғулланиб келган шахслар ушланган.
Шу билан бирга, Самарқанд вилоятининг Иштихон ҳамда Оқдарё туманларида валюта қимматликларини ноқонуний муомалага киритилишининг олди олинган.
Бундан ташқари, Самарқанд вилоятининг икки тумани, шунингдек, Хоразм вилоятининг Янгибозор туманида валюта айирбошлаш билан шуғулланиб келган шахслар ушланган.
Изоҳ (0)