Самарқанд вилоятининг икки тумани, шунингдек, Хоразм вилоятининг Янгибозор туманида валюта айирбошлаш билан шуғулланиб келган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, департаментнинг Пайариқ ва Қўшработ тумани бўлими ҳамкорлигида ўтказилган тезкор тадбирда фуқаро Х.Б. фуқаро Ю.Қ.га 4 минг долларни 50,9 млн сўмга сотган вақтда ашёвий далиллар билан ушланган.
Шу каби, департаментнинг Пайариқ ва Оқдарё тумани бўлимлари томонидан ўтказилган тезкор тадбирда фуқаро Б.У. фуқаро А.А.га 3 100 долларни 39,5 млн сўмга сотган вақтида ушланиб, 3 292 доллар, 10 евро ва 62 410 рубль ашёвий далил сифатида олинган.
Худди шу турдаги қонунбузилиш ҳолати Янгибозор туманида ҳам содир бўлган. Фуқаро Д.Г. фуқаро О.С.га 3 400 долларни 43 млн сўмга сотган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари олиб борилмоқда.
Изоҳ (1)
Salom ninaga Pastdargomda valytafuishlar ushlanmaydi departameni kuchi etmaydimi?