Фарғона вилоятининг Марғилон ҳамда Қувасой шаҳарларида валюта қимматликлари савдоси билан шуғулланиб келган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Марғилон шаҳрида валюта айирбошлаш билан шуғулланиб келган фуқаро М.А. (муқаддам Жиноят кодексининг 177-моддаси билан судланган) фуқаро М.Х.га жами 3 700 долларни 47,5 млн сўмга сотган вақтида ашёвий далиллар билан ушланган.
Шунингдек, Қувасой шаҳрида валюта айрибошлаш билан шуғулланиб келган фуқаро К.Р. фуқаро К.Ш.га 3 500 долларни 44,9 млн сўмга сотган вақтда ашёвий далиллар билан ушланган.
Мазкур ҳолатлар юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.
Қўлга олинаётган “валютчик”лар
Аввалроқ Бухоро, Хоразм ва Тошкент вилоятларида валюта қимматликлари савдоси билан шуғулланиб келган шахслар ушланган эди. Шунингдек, Андижон вилоятининг Балиқчи ҳамда Олтинкўл, Бухоро вилоятининг Пешку туманида валюта қимматликлари савдоси билан шуғулланиб келган шахслар ушланган.
Шу билан бирга, Самарқанд вилоятининг Иштихон ҳамда Оқдарё туманларида валюта қимматликларини ноқонуний муомалага киритилишининг олди олинган.
Бундан ташқари, Самарқанд вилоятининг икки тумани, шунингдек, Хоразм вилоятининг Янгибозор туманида валюта айирбошлаш билан шуғулланиб келган шахслар ушланган.
Изоҳ (0)