Microsoft асосчиси Билл Гейтс 101 миллиард доллардан ортиқ бойлигининг деярли барини хайрия мақсадларига ажратишга қарор қилди. Унинг уч нафар фарзанди — Женнифер, Рори ва Фиби отасининг бойлигидан фақат 1% дан кам қисмини мерос қилиб олади. Бу ҳақда Korrespondent.net хабар берди.
Билл Гейтс ҳинд подкастери Раж Шаманига берган интервьюсида нима учун ўз болаларини меросдан маҳрум қилгани сабаби ҳақида сўзлаб берди:
“Фарзандларим болалиги ажойиб ўтди, улар жуда яхши таълим олишди, мен уларга бойлигимнинг 1% дан камини мерос қиламан, чунки Microsoft сулоласини яратишни хоҳламайман ва улардан компанияни бошқаришларини талаб қилмайман”, деди у.
Билл Гейтс таъкидлашича, бойлигининг катта қисмини атрофдаги муҳтожларга ёрдам бериш учун сарфланиши керак. У Gates Foundation орқали ҳақиқатдан эҳтиёжманд аҳолига эҳсон қилишни мақсад қилган. Жамғарма 2000 йилда Гейтснинг собиқ рафиқаси Мелинда билан биргаликда ташкил этилган. Ҳозирда у дунёдаги энг йирик хайрия ташкилоти бўлиб, соғлиқни сақлаш, таълим ва қашшоқликни бартараф этишга қаратилган.
Фарзандларингиз бу қарордан ранжидими, деган саволга Билл қуйидагича жавоб берди:
“Болалар сизнинг қўллаб-қувватлашингиз ва меҳрингизга шубҳа қилмасликлари муҳим. Шунинг учун уларга ёшлигидан ўз фалсафангизни тушунтириб боришингиз керак: фарзандларимнинг барига тенг муомала қилишим, уларга катта имкониятлар ярата олишимни, лекин охир-оқибат бойликнинг катта қисмини эҳтиёжмандларга ёрдам бериш учун сарфлашимни болаликдан англашлари муҳим”, деди миллиардер.
Гейтс фарзандларининг бу қарорни тушуниб, қўллаб-қувватлаётганига ишонади.
Изоҳ (0)