Microsoft асосчиларидан бири Билл Гейтс сайёрани қутқариш баҳонасида АҚШда озиқ-овқат ишлаб чиқаришни монополияга айлантирмоқда, дейди тадқиқотчи журналист Симус Брунер.
Брунер ўзининг “Контролигархлар” китобида Гейтс атроф-муҳитни ҳимоя қилиш ниқоби остида Америка қишлоқ хўжалиги ерларини қандай сотиб олгани ва ўғитлар, сунъий гўшт ва сут маҳсулотларига сармоя киритганлиги ҳақида сўз юритади.
“Аввал уруғлар ва ўғитлар патентланди, энди эса улар гўштнинг муқобил турларини патентлашмоқда.
Чорвачиликни тақиқлаш муқобил оқсил ишлаб чиқарувчи компанияларга монополия имконини беради ва Билл Гейтс, Жефф Безос, Марк Цукерберг ва ҳатто BlackRock каби инвесторларга фойда келтиради. Сунъий гўшт сайёрани қутқаришга эмас, озиқ-овқат бозорини назорат қилишга ёрдам беради”, — дея журналистнинг сўзларини келтиради Fox News телеканали.
“Контролигархлар”да тақдим этилган маълумотларга кўра, Гейтс Рокфеллерлар оиласи томонидан бошланган озиқ-овқат тизимини эгаллашни давом эттирмоқда.
2021 йилда Билл Гейтс ўрта ва юқори даромадли мамлакатлар фуқаролари фақат 100 фоиз сунъий гўштни истеъмол қилишлари кераклигини маълум қилганди.
Унинг сўзларига кўра, ўсимлик асосидаги гўшт маҳсулотларини истеъмол қилиш орқали бой давлатлар иқлим ўзгаришига қарши глобал курашда ёрдам бериши мумкин. Чунки табиий гўшт олинадиган чорва молларини сақлаш ҳавога катта миқдордаги метан газлари чиқишига сабаб бўлади.
Изоҳ (0)