Дунёнинг энг бадавлат одамлари бўш вақтида нималар билан шуғулланади?

Мазкур миллиардерлар тиғиз иш жадвалига қарамай, ҳордиқ чиқариш учун, албатта, бўш вақт топишади. Бундай пайтларда эса ҳамма ўзининг севимли машғулоти билан шуғулланади.

Тим Кук велосипед минишни ва тоғга чиқишни яхши кўради. 2014 йилда The Wall Street Journal Ёсемите ва Сион миллий боғлари унинг севимли дам олиш масканларидан бири эканлигини ёзган.

Марк Цукерберг яккакураш спорт турларига қизиқади ва гитара чалади. Сўнгги йилларда Марк Цукерберг аралаш яккакурашларга бўлган муҳаббати ҳақида гапирган. У UFC жанглари пайтида рингда кузатилган ва ҳатто ноябрь ойида спарринг пайтида жиддий жароҳат олган. Агар унинг ижтимоий тармоқларини варақласангиз, Цукерберг акустик гитарани яхши чалишини кўриш мумкин.

Жефф Безос фитнесга содиқ. Йиллар ўтиши билан у тобора бақувват бўлиб бормоқда ва, эҳтимол, кўп жиҳатдан спортга бўлган иштиёқи туфайли. Безоснинг қаллиғи Лорен Санчес Vogue нашрига берган интервьюсида Amazon асосчиси “тренажёр залидаги махлуқ” эканини айтади. Маълум қилинишича, унинг шахсий мураббийи Уэс Окерсон Том Круз билан ҳам ишлаган.

Ларри Эллисон сув спортининг ҳақиқий мухлиси. Эллисон 2010 йилда Америка кубоги 33-пойгасида ғолиб чиққан Oracle Team USA елканли жамоасини қисман молиялаштирган. Аммо у шунчаки ҳомий эмас. Oracle компаниясининг техник директори Эллисоннинг ўзи ҳам 1990 йиллардан бери яхта пойгасида қатнашади. У, шунингдек, сувда вақт ўтказишни яхши кўради.

Сергей Брин адреналинга бой машғулотларни афзал кўради. Google ҳаммуассиси акробатика билан шуғулланади. Брин, шунингдек, гимнастика ва хоккей каби спорт турлари билан шуғулланишни ҳам яхши кўради.

Ларри Пейж табиат қўйнида фаол дам олишни яхши кўради. Google ҳаммуассиси Ларри Пейж Сан Франциско ҳудудида Atomic Farm органик фермасига эгалик қилади. Ҳамкасби, Google асосчиларидан бири Бриндан фарқли ўлароқ Ларри Пейж раҳбар лавозимидан кетганидан кейин нималар билан шуғуллангани ҳақида лом-мим демайди. Пейж Тинч океаннинг жанубий қисмидаги бир нечта хусусий оролларга эгалик қилади ва органик фермасига қараганда, табиатни яхши кўради. Уни кайтбордда сайр қилиб юрганини ҳам кўришган.

Сундар Пичай — футбол ишқибози. Alphabet бош директори “Барселона”нинг катта мухлиси. Пичай жамоа билан 2017 йилда учрашган ва индивидуал футболка олган. Ташриф давомида у “Олтин тўп” ва Лионель Месси соврини билан суратга тушган.

Билл Гейтс автомобилларни коллекция қилади. Microsoft ҳаммуассиси Билл Гейтснинг ҳақиқий миллиардерга ўхшаб, жиддий маблағ талаб қиладиган севимли машғулоти бор. Гейтс ҳашаматли автомобилларни йиғишни яхши кўради, айниқса, унга Porsche ёқади. Унинг Вашингтондаги Медина шаҳридаги мулкида 20 та автомобилга мўлжалланган гаражи бор. Унинг биринчи йирик хариди 1979 йилда Porsche 911 суперкари бўлган.

Илон Маск — геймер. Кўп йиллар давомида у видеоўйинларга бўлган муҳаббатини очиқчасига эълон қилган. Унинг собиқ севгилиси — Грэймс номи билан танилган Клер Буш биограф Уолтер Айзексонга Маск Elden Ring ўйинини ўйнаб тун бўйи ухламаганини айтган.

Сатя Наделла — крикетнинг катта мухлиси. Microsoft бош директори Американинг Seattle Orcas профессионал крикет жамоасининг ҳаммуассиси. 2023 йилги крикет бўйича жаҳон чемпионати пайтида у The Times of India нашрига ўйинга бўлган муҳаббати ҳақида гапириб берган.

Сем Алтман пойга машиналарини яхши кўради ва охирзамонга тайёргарлик кўради. 2016 йилда Алтман The New Yorker газетасига бешта пойга автомобили, жумладан, иккита McLarenс ва Tesla’си борлигини айтганди. Шунингдек, у ядровий уруш ёки одамларга қарши сунъий интеллект қўзғолони учун “қурол, олтин, антибиотиклар, батареялар, сув ва газниқоблар захираси борлигини” қистириб ўтган.