Microsoft асосчиларидан бири, миллиардер Билл Гейтснинг фикрича, сунъий интеллектнинг (Artificial intelligence — AI) ривожланиши инсониятга уч кунлик иш ҳафтасига эришиш имконини беради. Бу ҳақда у Spotify’даги “What now?” подкастига берган интервьюсида айтиб ўтди. Гейтснинг сўзларини Business Insider келтирди.
Суҳбат давомида подкаст бошловчиси ва комик Тревор Ноа сунъий интеллектнинг ривожланиши иш ўринларининг қисқариши хавфини туғдирадими, деб сўради. Бунга жавобан Гейтс келажакда одамларнинг “бу қадар кўп меҳнат қилишига зарурат қолмайдиган” вақт келиши мумкинлигини айтди. Унинг тахминича, бутун дунёда “озиқ-овқат ва барча бошқа нарсаларни машиналар ишлаб чиқарадиган” бўлади.
“Агар ҳафтасига атиги уч кун ишлаш талаб этиладиган жамият қура олсангиз, менимча, бу яхши”, — деди Гейтс.
Business Insider таъкидлаганидек, Гейтс июль ойида ўз блогида АI ривожланиши билан баъзи ишчилар қайта тайёрловга муҳтож бўлишини, буни ҳукуматлар ва компаниялар ҳал қилиши кераклигини айтганди.
“Мен сунъий интеллектнинг таъсири саноат инқилоби каби улкан бўлади, деб ўйламайман, лекин бу, албатта, шахсий компьютер яратилиши воқеасидек катта бўлади”, — деган ўша пайтда Microsoft асосчиси.
Октябрь ойида JPMorgan молиявий корпорацияси раҳбари Жейми Даймон ҳам сунъий интеллект ривожланиши билан иш ҳафтасининг давомийлиги қисқаришини айтганди.
“Фарзандларингиз 100 ёшгача яшайди, технология туфайли саратон касаллигига чалинмайди ва улар катта эҳтимол билан ҳафтада уч ярим кун ишлайди”, — деган у Bloomberg агентлигига берган интервьюсида.
Турли ижтимоий сўровлар шуни кўрсатдики, кўпчилик сунъий интеллект туфайли ишдан бўшатилиши ёки маошлари қисқартирилишидан қўрқмоқда. Хусусан, Қўшма Штатларда сўровда қатнашган ишчиларнинг 79 фоизи АI туфайли маошлари камайиб кетишидан хавотирдалигини айтган.
Изоҳ (0)