Яқинда ўғлининг никоҳ тўйидан олдин уюштирган 3 кунлик базм туфайли Мукеш Амбани ОАВда катта шов-шувларга сабаб бўлганди. Меҳмонлар рўйхатида 1,200 киши — улар орасида Билл Гейтс, Марк Цукерберг ва рафиқаси Присцилла, Канада собиқ бош вазири Стефан Ҳарпер, Австралия собиқ бош вазири Кевин Рудд, Disney бош директори Боб Игер ва Иванка Трамп ҳам бўлган. Кечанинг асосий меҳмони Рианна эса, миш-мишларга кўра 7 миллион АҚШ доллари эвазига тадбирда қўшиқ куйлаган
Бугун эса оила бошлиғи миллиардер Мукеш Амбанининг таълим олиши ва бизнесга кириб келиши ҳақида маълумот берамиз.
Мукеш Амбани Яманда туғилган, аммо кейинчалик оиласи билан Ҳиндистоннинг энг ривожланган шаҳарларидан бири бўлган Мумбайга кўчиб ўтади. Ўсмирлик йилларида Амбани Мумбайдаги Hill Grange ўрта мактабида ўқийди, сўнг бакалавриат бўйича коллежга ўқишга киради. Малака ошириш учун Амбани Стенфорд университетида MBA даражаси учун таълим олади. Фақатгина ўқишни якунлай олмайди — отаси Мукешни билимларини амалиётда қўллашга ва Reliance компаниясини ривожлантиришга ёрдам бериши учун чақириб олади.
1980 йилда Мукеш Ҳиндистонга қайтади ва бу қарор унинг тақдирида бурилиш нуқтаси бўлади. Олган таълими бўлажак миллиардерга компанияни шундай даражага кўтаришга ёрдам бердики, 1981 йилга келиб Reliance фақат нефтни қайта ишлаш ва нефть-кимё маҳсулотлари билан чекланмай, балки чакана савдо ва телекоммуникациялар билан ҳам шуғулланади. Ёш тадбиркор раҳбарлиги остида Reliance Jio Infocomm Limited энг йирик телекоммуникация секторларидан бирига, Reliance Retail Ltd. эса муваффақиятли чакана савдо тармоғига айланади.
Мукеш Амбани дунёнинг энг бадавлат одамлари бўйича Forbes рўйхатига киради ва Ҳиндистоннинг энг бой одами сифатида танилади. Ҳозирда унинг бойлиги 115 миллиард долларга баҳоланмоқда. Мукеш бош директор ва директорлар кенгаши раиси бўлиб ишлайдиган Reliance компанияси эса йилига 100 миллион доллардан ортиқ соф фойда келтиради. Мукеш бизнесдан ташқари спорт соҳасига ҳам инвестиция киритади, масалан, у мамлакатдаги энг муваффақиятли крикет жамоаси Mumbay Indians’ни сотиб олган ва Ҳиндистон футбол лигасининг асосчиси ҳисобланади.
Мукеш Амбанининг шахсий ҳаёти
Миллиардернинг ҳаёт тарзи унинг мақомига муносиб: Мукеш Амбани мамлакатнинг йирик хайрия қилувчиларидан бири, ибодатхоналар қуради, ҳайвонларни ҳимоя қилиш ташкилотларини қўллаб-қувватлайди. Бироқ Амбани кўп бизнесменлардан бир жиҳатда фарқ қилади — у 40 йилдан бери бир аёл билан ҳаёт кечирмоқда. 1985 йилда Мукеш ва Нита Амбани рақс пайтида танишиб қолади. Кейинчалик улар оила қуради, йиллар ўтгач эса Нита уч фарзандни дунёга келтиради. Жуфтлик ҳали ҳам барча тадбирларга биргаликда боради.
Тижорат бойлиги билан бир қаторда, Амбани оиласи бир нечта кўчмас мулкларга эгалик қилади. Лекин Амбани оиласининг асосий бойлиги Чикаго меъморлари Perkins & Will томонидан лойиҳалаштирилган — 27 қаватли Антилия уйидир. Учта вертолёт майдончаси, спортзал, кинотеатр ва 160 машина сиғадиган гаражи билан бу бино 1 миллиард долларга баҳоланади ва дунёдаги энг қиммат хусусий уйлардан бири ҳисобланади. Бироқ у ерда фақат Мукеш ва унинг рафиқаси эмас, балки миллиардернинг онаси Кокилабен Амбани, шунингдек жуфтликнинг уч фарзанди — эгизак ўғиллари Анант ва Акаш, ҳамда қизи Иша оиласи билан яшашади.
Изоҳ (0)