Microsoft asoschisi Bill Geyts 101 milliard dollardan ortiq boyligining deyarli barini xayriya maqsadlariga ajratishga qaror qildi. Uning uch nafar farzandi — Jennifer, Rori va Fibi otasining boyligidan faqat 1% dan kam qismini meros qilib oladi. Bu haqda Korrespondent.net xabar berdi.
Bill Geyts hind podkasteri Raj Shamaniga bergan intervyusida nima uchun o‘z bolalarini merosdan mahrum qilgani sababi haqida so‘zlab berdi:
“Farzandlarim bolaligi ajoyib o‘tdi, ular juda yaxshi ta’lim olishdi, men ularga boyligimning 1% dan kamini meros qilaman, chunki Microsoft sulolasini yaratishni xohlamayman va ulardan kompaniyani boshqarishlarini talab qilmayman”, dedi u.
Bill Geyts ta’kidlashicha, boyligining katta qismini atrofdagi muhtojlarga yordam berish uchun sarflanishi kerak. U Gates Foundation orqali haqiqatdan ehtiyojmand aholiga ehson qilishni maqsad qilgan. Jamg‘arma 2000-yilda Geytsning sobiq rafiqasi Melinda bilan birgalikda tashkil etilgan. Hozirda u dunyodagi eng yirik xayriya tashkiloti bo‘lib, sog‘liqni saqlash, ta’lim va qashshoqlikni bartaraf etishga qaratilgan.
Farzandlaringiz bu qarordan ranjidimi, degan savolga Bill quyidagicha javob berdi:
“Bolalar sizning qo‘llab-quvvatlashingiz va mehringizga shubha qilmasliklari muhim. Shuning uchun ularga yoshligidan o‘z falsafangizni tushuntirib borishingiz kerak: farzandlarimning bariga teng muomala qilishim, ularga katta imkoniyatlar yarata olishimni, lekin oxir-oqibat boylikning katta qismini ehtiyojmandlarga yordam berish uchun sarflashimni bolalikdan anglashlari muhim”, dedi milliarder.
Geyts farzandlarining bu qarorni tushunib, qo‘llab-quvvatlayotganiga ishonadi.
Izoh (0)