Ўзбекистон Бош консулхонаси ходимлари томонидан Екатеринбург шаҳрида оилавий зўравонлик қурбони бўлган аёл ва унинг вояга етмаган фарзандларига амалий ёрдам кўрсатилди.
Хабар берилишича, жорий йилнинг 1 апрель куни Ўзбекистон фуқароси М.Т. Екатеринбург шаҳрида вақтинча яшаётган қизи ва унинг болаларини турмуш ўртоғининг зулмидан озод қилиш ва доимий яшаш манзилига етиб олишига амалий ёрдам беришни сўраб мурожаат қилган.
Мазкур оила 2024 йил январь ойида Екатеринбург шаҳрига ишлаш мақсадида келган. Оиладаги келишмовчиликлар, доимий тазйиқ ва уруш жанжал аёлга жиддий руҳий таъсир кўрсатган. Бош консулхона ходимлари ушбу оила яшаётган хонадонда бўлиб, мавжуд ҳолат билан яқиндан танишди.
Шундан сўнг аёл ва унинг болалари вақтинча уй-жой билан таъминланди. Уларнинг шахсини тасдиқловчи ҳужжатлари яроқсиз ҳолга келгани ва молиявий қийин аҳволда қолгани учун ватанга қайтиш гувоҳномаси ҳеч қандай тўловлар ундирилмасдан расмийлаштирилди.
Шунингдек, Екатеринбург—Самарқанд авиақатновига чипта харид қилиб берилди. Улар 8 апрель куни Екатеринбург шаҳридаги “Колсово” халқаро аэропортидан Самарқанд вилоятига кузатиб қўйилди.
Ўзбекистонга қайтарилаётган фуқаролар
2025 йилнинг бошларида Россиянинг Тива Республикаси Оқ Довурак шаҳрида вақтинча ишлаётган тўрт нафар Ўзбекистон фуқароси ватанга қайтарилди. Фуқароларнинг яшаш жойида содир бўлган кучли ёнғин натижасида уларнинг ҳужжатлари, шу жумладан, паспортлари йўқолган.
27 февраль куни Маккада оғир касалликка чалинган ўзбекистонлик ватанга қайтарилди. Февраль ойи охирида Россияда икки боласи билан қийин вазиятда қолган аёл Ўзбекистонга қайтарилди.
2025 йил 5 март куни Россиянинг Владивосток шаҳрида оғир тан жароҳати олган Ўзбекистон фуқароси ватанга қайтарилди. Март ойининг ўрталарида Новосибирскдаги Бош консулхонаси кўмагида Россиянинг Саха республикаси Нерюнгри шаҳрида қийин ҳаётий вазиятга тушиб қолган она ва унинг тўрт нафар фарзанди Ўзбекистонга қайтарилди. 17 март куни ота-она қарамоғисиз қолган 10 нафар вояга етмаган бола Қозоғистондан Ўзбекистонга қайтарилди. Шунингдек, Россияда ота-она қарамоғисиз қолган 30 нафар бола Ўзбекистонга қайтарилди.
Изоҳ (0)