O‘zbekistonlik 10 nafar voyaga yetmagan bola Qozog‘istondan vatanga qaytariladi. Bu haqda Ijtimoiy himoya milliy agentligi xabar berdi.
Unda aytilishicha, 17-mart kuni Ichki ishlar va Sog‘liqni saqlash vazirliklari xodimlari xorijda ota-ona qaramog‘isiz qolgan bolalarni O‘zbekistonga qaytarish maqsadida xizmat safari bilan Qozog‘istonga jo‘nab ketdi.
Ota-ona qaramog‘isiz qolgan 10 nafar, xususan, Atirov shahrida 1 nafar, Olmaota shahrida 8 nafar va Mang‘istov shahrida 1 nafar bolalar davlat yordamiga muhtoj bo‘lib, ishchi guruh vakillari tomonidan ularni o‘z oilalari bag‘riga qaytarish rejalashtirilgan.
Qayd etilishicha, Ijtimoiy himoya milliy agentligi tasarrufidagi “Inson” ijtimoiy xizmatlar markazi ushbu bolalarning oilaviy muhitga qaytishi uchun barcha zarur chora-tadbirlarni amalga oshirmoqda.
Ijtimoiy himoya milliy agentligi IIV va boshqa hamkor tashkilotlar bilan birgalikda xorijda qiyin vaziyatga tushgan bolalarni vatanga qaytarish va ularga ijtimoiy yordam ko‘rsatish bo‘yicha chora-tadbirlarni davom ettirmoqda.
Ma’lumot uchun, yil boshidan beri xorijda ota-ona qaramog‘idan mahrum bo‘lgan 10 nafar bola vatanga qaytarildi.
2024-yil avgust—sentyabr oylarida xorijda ota-ona qaramog‘idan mahrum bo‘lgan 34 nafar bola O‘zbekistonga qaytarilgandi. Oktyabr oyida Rossiyada qarovsiz qolgan 8 oylik chaqaloq O‘zbekistonga, ota-onasi bag‘riga qaytarildi. Moskvadagi voyaga yetmagan huquqbuzarlarni vaqtincha saqlash markazidan 4 nafar bola O‘zbekistonga olib kelindi.
O‘sha oyda Turkiyada ota-onasining qarovisiz qolib ketgan uch nafar voyaga yetmagan bola O‘zbekistonga qaytarildi. Noyabrda Dubayni tark etish taqiqlangan o‘zbekistonlik bolaga vatanga qaytishiga yordam berildi. Dekabrda Rossiyada ota-ona qaramog‘isiz qolgan 15 nafar bola O‘zbekistonga qaytarildi.
Shuningdek, Rossiyaning Tiva Respublikasi Oq Dovurak shahrida vaqtincha ishlayotgan va hujjatlarini yo‘qotgan to‘rt nafar O‘zbekiston fuqarosi vatanga qaytarilgandi.
2025-yilning fevral oyi oxirida Rossiyada ikki bolasi bilan qiyin vaziyatda qolgan ayol O‘zbekistonga qaytarilgandi.
14-mart kuni O‘zbekiston IIV, SSV xodimlaridan iborat ishchi guruh xorijda ota-onasi qaramog‘idan mahrum bo‘lgan fuqarolarning bolalarini vatanga qaytarish maqsadida xizmat safariga Rossiyaga jo‘nab ketgandi. Hozirda Moskva, Sankt Peterburg, Astraxan, Volgograd, Irkutsk, Chelyabinsk, Vladivostok va Ulyanovsk shaharlarida, shuningdek, Moskva, Leningrad, Oryol, Smolensk va Vladimir viloyatlarida ota-ona qaramog‘idan mahrum bo‘lgan 30 nafar bolaning hujjatlarini rasmiylashtirish ishlari olib borilmoqda.
Izoh (0)