Россиянинг Санкт Петербург шаҳрида бир гуруҳ эркаклар 21 ёшли ўзбекистонликни ўғирлаб кетиб, уни қайтариш учун 40 минг рубль (салкам 472 доллар) талаб қилди. Бу ҳақда 78.ru хабар берди.
Петербурглик аёл 30 март куни полицияга қўнғироқ қилиб, ўғли одам ўғирлашга гувоҳ бўлганини айтган. Унга кўра, Халтурин кўчасида 6-7 нафар эркак мигрантни дўппослаган ва автомобилга ўтқазган. Жабрланувчининг ҳамроҳи ҳам машинага ўтирган. Шундан сўнг улар кўздан ғойиб бўлган.
Бир неча соатдан кейин ўғирланган ўзбекистонлик йигитнинг акаси полицияга мурожаат қилган. У номаълум шахслар қўнғироқ қилиб, укаси уларнинг қўлида эканини айтганини маълум қилган. Ўғрилар 40 минг рубль талаб қилган.
Ўғриликда гумон қилиниб, 20 ёшдан 45 ёшгача бўлган олти киши қўлга олинган, уларнинг барчаси хорижлик бўлиб чиққан. Ўғирланган шахс Стачек проспектидаги 9-уйдан топилган, у баъзи гумонланувчилар билан таниш бўлган.
Етти киши, жумладан, жабрланувчи ҳам изоляторга жойлаштирилган. Ўзбекистон фуқароси миграция қоидабузарликлари содир этгани айтилмоқда. Ҳолат юзасидан жиноят иши қўзғатилган. Эҳтиёт чорасини танлаш масаласи ҳал қилинмоқда. Воқеанинг барча тафсилотлари аниқланмоқда.
Изоҳ (0)