Rossiyaning Vladivostok shahrida og‘ir tan jarohati olgan O‘zbekiston fuqarosi vatanga qaytarildi. Bu haqda “Dunyo” AA xabar berdi.
Maʼlum qilinishicha, samarqandlik fuqaro ariza bilan murojaat qilib, o‘g‘li S.G. baxtsiz hodisa oqibatida jiddiy jarohat olib, Vladivostok shahar 2-sonli klinik shifoxonasida yotganini va dori-darmon uchun yetarli mablag‘ qolmaganini bildirgan.
Fuqaro S.G. 2023-yilda Rossiyaning Xabarovsk o‘lkasiga vaqtincha mehnat faoliyatini amalga oshirish uchun kelgan. Ammo o‘tgan yili oktyabr oyida Birobidjan shahrida ehtiyotsizligi oqibatida daraxtdan yiqilib, bo‘yin umurtqa qismini sindirib olgan. Birobidjan shahar markaziy shifoxonasida unga operatsiya muolajasi o‘tkazilib, statsionar davolashga olingan.
Biroq bemorning otasi Birobidjan shahar markaziy shifoxonasida davolanayotgan o‘g‘lining sog‘lig‘idan ko‘ngli to‘lmay, uni Vladivostok shahar 2-sonli klinik shifoxonasiga o‘tkazadi. Bu yerda ham shifokorlar bemorda qayta operatsiya o‘tkazish kerakligini bildirgan.
Biroq fuqarolarda operatsiya uchun yetarli mablag‘ yo‘qligi uchun davolanishni O‘zbekistonda davom ettirishga qaror qiladi.
O‘zbekiston diplomatlari ko‘magida 5-mart kuni bemor fuqaroning O‘zbekistonga qaytib ketishi uchun Vladivostok – Toshkent yo‘nalishidagi samolyotiga chipta sotib olib berildi va oilasi bag‘riga kuzatib qo‘yildi.
Xorijdan O‘zbekistonga qaytarilayotgan shaxslar
2024-yil avgust—sentyabr oylarida xorijda ota-ona qaramog‘idan mahrum bo‘lgan 34 nafar bola O‘zbekistonga qaytarilgandi. Oktyabr oyida Rossiyada qarovsiz qolgan 8 oylik chaqaloq O‘zbekistonga, ota-onasi bag‘riga qaytarildi. Moskvadagi voyaga yetmagan huquqbuzarlarni vaqtincha saqlash markazidan 4 nafar bola O‘zbekistonga olib kelindi.
O‘sha oyda Turkiyada ota-onasining qarovisiz qolib ketgan uch nafar voyaga yetmagan bola O‘zbekistonga qaytarildi. Noyabrda Dubayni tark etish taqiqlangan o‘zbekistonlik bolaga vatanga qaytishiga yordam berildi. Dekabrda Rossiyada ota-ona qaramog‘isiz qolgan 15 nafar bola O‘zbekistonga qaytarildi.
Shuningdek, Rossiyaning Tiva Respublikasi Oq Dovurak shahrida vaqtincha ishlayotgan va hujjatlarini yo‘qotgan to‘rt nafar O‘zbekiston fuqarosi vatanga qaytarilgandi.
2025-yilning fevral oyi oxirida Rossiyada ikki bolasi bilan qiyin vaziyatda qolgan ayol O‘zbekistonga qaytarilgandi.
Izoh (0)