Ўзбекистонни ривожлантиришга оид 12 та халқаро ташкилотлар ва консалтинг компанияларидан келиб тушган жами 100 дан ортиқ тавсиялар кўриб чиқилмоқда. Бу ҳақда Стратегик ислоҳотлар агентлиги хабар бермоқда.
Айтилишича, таклиф ва ташаббуслар Deutsche Bahn (Германия) компанияси, Жаҳон банки, БМТнинг Озиқ-овқат ва қишлоқ хўжалиги ташкилоти, Reformatiks (Грузия), Европа тараққиёт ва тикланиш банки, Швейцария ривожланиш ва ҳамкорлик агентлиги, ЖССТ каби бир қатор халқаро нуфузли ташкилотлардан қабул қилинмоқда.
Кўриб чиқиш таклиф этилаётган масалаларда асосан транспорт, энергетика, молия, бандлик ва миграция, қишлоқ хўжалиги каби бир қатор муҳим йўналишларни қамраб олинган.
Жумладан, Deutsche Bahn (Германия) компанияси томонидан транспорт инфратузилмасини халқаро стандартларга мувофиқ лойиҳалаш ва техник назорат қилишга доир таклиф илгари сурилган.
Ҳозирда транспортни ва транспорт инфратузилмасини комплекс режалаштириш ва ривожлантириш борасида ўрта ва узоқ муддатли мақсадларни амалга ошириш чора-тадбирлари белгиланмаган.
Жаҳон банкидан келиб тушган таклиф энергетикада электр энергиясини узатиш учун алоҳида тарифларни жорий этиш орқали хусусий инвесторларга шаффоф нархлар ва тенг шароитларни таъминлаш масаласини ўз ичига олган. Мазкур ташкилот томонидан таклиф этилаётган ислоҳотларда тоза энергия таъминотини ошириш учун энергия субсидияларини ислоҳ қилиш орқали электр энергияси ва табиий газнинг ўз-ўзини қоплаш даражасини 100 фоизга етказиш (ҳозирда 87 фоиз ва 71 фоиз) назарда тутилмоқда.
Бундан ташқари, Reformatiks консалтинг компанияси божхона расмийлаштируви харажатларини камайтириш учун божхона маъмуриятини ислоҳ қилиш, кўчмас мулк билан боғлиқ транзакцияларни тезлаштиришга доир ташаббусни илгари сурган. Шу билан бирга мазкур компания томонидан визаларни либераллаштириш, ҳаво қатновини диверсификациялаш ва ребрендинг орқали туризмни янада ривожлантиришни таклиф қилган.
Шунингдек, қишлоқ хўжалигига оид бир қатор таклифлар кўриб чиқилмоқда. Масалан, БМТнинг Озиқ-овқат ва қишлоқ хўжалиги ташкилоти “Аниқ деҳқончилик” технологиялари ва тадқиқотларга инвестицияларни кўпайтириш, оилавий фермер хўжаликларини кичик механизация орқали қўллаб-қувватлаш заруриятини қайд этган.
Юқоридаги таклифлар билан бир қаторда, Европа тараққиёт ва тикланиш банки томонидан кенг қамровли сув бюджетини ишлаб чиқиш масаласи кўтарилди, Швейцария ривожланиш ва ҳамкорлик агентлиги суғориш графикларини метеорологик станциялар маълумотлари билан интеграция қилишни таклиф этган. Шунингдек, Жаҳон банки томонидан билдирилган яна бир таклиф чиқиндиларни бошқариш бўйича янги муҳандислик кадрларини тайёрлаш, ҳаво сифатини бошқариш миллий стратегиясини (АҚМ) қабул қилиш, жамоат транспортида хусусий сектор томонидан электр транспортидан фойдаланишни кенгайтиришни ўз ичига олган.
Келиб тушаётган барча таклифлар ва тавсиялар асосида комплекс “йўл харита” тасдиқлаш, тавсиялардан келиб чиқиб, 2025 йилда стратегик йўналишлардаги ислоҳотларни амалга ошириш чора-тадбирлар режаси лойиҳасини тайёрлаш назарда тутилган.
Изоҳ (0)