Мутахассислар IQAir платформаси маълумотлари ҳар доим ҳам аниқ бўлмаслигини таъкидлаб, нега умумеътироф этилган ҳаво сифати индексига тўлиқ ишониш мумкин эмаслиги сабабларини тушунтирди.
Дунёдаги энг йирик бепул ҳаво сифати мониторинги платформаси IQAir кўрсаткичлари аниқми, деган савол Ўзбекистон Экологик партияси мунозаралар клубида муҳокама қилинди.
Муҳокама давомида Экология, атроф-муҳитни муҳофаза қилиш ва иқлим ўзгариши вазирлиги мутахассиси Баҳром Эсанов IQAir маълумотларига доим ҳам ишониш мумкин эмаслигини айтди. Расмийга кўра, бунинг сабаби, исталган жисмоний ёки юридик шахс ўзи ўрнатган сенсорларни платформага киритиш имкониятига эга эканлигидир.
Мутахассисларнинг маълум қилишича, Тошкентда платформага уланган сенсорлар икки саноат корхонаси ўртасида ўрнатилган ҳолатлар ҳам кузатилган. Бундай жойлашув фақат ўша ҳудуддаги ҳаво сифатига салбий таъсир кўрсатибгина қолмай, бутун шаҳар бўйича кўрсаткичларнинг ёмонлашувига олиб келган.
Шунингдек, Ўзбекистондаги атмосфера ҳавоси сифатини нима учун Япония ва Европа мамлакатлари кўрсаткичлари билан таққослаб бўлмаслиги ҳам тушунтириб берилди. Экологларнинг таъкидлашича, у ерларда ҳаво намлиги юқори бўлгани сабабли чангланиш даражаси жуда паст. Дунёнинг қурғоқчил минтақаларида эса ҳаводаги PM2,5 заррачаларининг юқори миқдори ундаги табиий чанг мавжудлиги билан боғлиқлиги айтилди.
Эслатиб ўтамиз, яқинда Тошкентда ҳаво ифлосланиши рекорд даражага етгандан сўнг, пойтахт аҳолиси ижтимоий тармоқларда “Бизга тоза ҳаво керак” номли челленж бошлаган ва ҳукуматдан экологик вазиятни яхшилаш чораларини кўришни талаб қилган эди.
Изоҳ (1)
Кор емасмиску алдаманглар агар билет йоки штраф болганида еди Европа дан арзон дейиларди шу хаводан озларинг хам нафас олаяпсизлар шуни унутманг