O‘zbekistonda ekologik nosoz deb topilgan mashinalar haydovchilariga chora ko‘riladi, deb xabar bermoqda Ekologiya vazirligi axborot xizmati.
Maʼlum qilinishicha, Ekologiya, atrof-muhitni muhofaza qilish va iqlim o‘zgarishi vazirligi hamda Ichki ishlar vazirligi bilan hamkorlikda Qoraqalpog‘iston Respublikasi, viloyatlar markazlari va Toshkent shahrida navbatdagi “Toza havo” oyligi o‘tkaziladi.
Tadbir “Atmosfera havosini muhofaza qilish to‘g‘risida”gi hamda “Ekologik nazorat to‘g‘risida”gi qonunlari ijrosini taʼminlash, foydalanishda bo‘lgan avtotransport vositalarining ekologik holatini nazorat qilish maqsadida ikki bosqichda bo‘lib o‘tadi.
Birinchi bosqich 10-apreldan 10-maygacha, ikkinchi bosqich esa 10-avgustdan 10-sentyabrgacha tashkil etiladi (Toshkent shahrida 10-sentyabr—10-oktyabr).
“Toza havo” oyligi davomida muntazam YPX maskanlarida, majburiy texnik ko‘rikdan o‘tkazishda hamda ko‘chalarda harakatlanayotgan avtotransport vositalari tekshiriladi. Ekologik nosoz deb topilgan avtotransport vositalari haydovchilariga nisbatan Maʼmuriy javobgarlik to‘g‘risidagi Kodeksning 87- va 125-moddalariga ko‘ra choralar ko‘riladi.
Shuningdek, “Atmosfera havosini muhofaza qilish to‘g‘risida”gi qonunning 13-moddasiga asosan, avtotransport vositalaridan nosozligi bartaraf etilgunga qadar foydalanish taqiqlanadi.
2023-yilgi “Toza havo” oyligi tadbirlari davomida avtotransportlarning yuz mingtasi nosoz ekani aniqlangan edi. Mamlakatda jismoniy shaxslarga tegishli jami 3 268 480 ta avtotransport vositasi foydalanishda bo‘lib, shundan 796 034 tasi (24 foiz) benzin, 71 088 tasi (2 foiz) dizel va 2 401 348 tasi (74 foizi) gazda harakatlanishga mo‘ljallangan.
Izoh (0)