Самарқанд ва Бухоро вилоятларида норуда фойдали қазилмаларни ўзбошимчалик билан қазиб олиш ҳолатлари фош этилди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, Қўшработ туманида “Ш.Б.” МЧЖ раҳбари А.Х. ва бошқалар “Шова” МФЙ ҳудудидан ўтувчи сой бўйидан норуда фойдали қазилма ҳисобланган қум-шағал аралашмасини корхона махсус техникалари ёрдамида қазиб олган. Уларнинг МЧЖ ишлаб чиқариш цехига етказиб бераётганликлари аниқланиб, 3 дона махсус техникалар ашёвий далил сифатида расмийлаштирилган.
Шунингдек, ўтказилган терговга қадар текширувда МЧЖ масъул шахслари жами 35,8 минг куб ҳажмдаги қум-шағал аралашмасини ўзбошимчалик билан қазиб олгани аниқланди. Натижада давлат ва жамият манфаатларига 3,9 млрд сўм зарар етказилган.
Бундан ташқари, Бухоро туманидаги гипс кони ҳудудидан “С.м.”, “W.г.”, “А-Г.”, “К.З.” ва “Б.Г.” МЧЖ масъул шахслари жами 33,5 минг куб ҳажмдаги гипс тошларини ўзбошимчалик билан қазиб олган. Натижада давлат ва жамият манфаатларига 3,4 млрд сўм зарар етказилган.
Мазкур ҳолатлар юзасидан Жиноят кодексининг 229-моддаси (ўзбошимчалик) ва 192-11-моддаси (нодавлат тижорат ташкилотида ёки бошқа нодавлат ташкилотида мансабдор шахслар томонидан ўз ваколатларини суиистеъмол қилиш) билан жиноят ишлари қўзғатилиб, тергов ҳаракатлари ўтказилмоқда.
Норуда материалларни қазиб олиш ҳолатлари
Ҳукумат қарори билан норуда материалларни қазиб олиш бўйича мораторий татбиқ этилган ҳудудларнинг чегаралари белгиланганди. Бунда мораторий татбиқ этиладиган дарёлар ҳудудлари чегараларига дарё ўзанлари, уларнинг соҳилбўйи минтақалари ва сувни муҳофаза қилиш зоналари киради.
Бундан аввал Қашқадарёда табиий қум қазиб олиниши натижасида табиатга 6 млрд сўмдан ортиқ зарар етказилгани ҳақида хабар берилганди.
2024 йилнинг октябрь ойи охирида Чирчиқ дарёсидан қум-шағал аралашмаси қазиб олиниши оқибатида табиатга 273,8 млрд сўм зарар етказилганди.
Ноябрь ойи бошида эса Қашқадарё ва Самарқанд вилоятларида фойдали қазилмаларни ўзбошимчалик билан қазиб олиш ҳолатлари фош этилганди. Чирчиқ дарёсидан қум-шағал аралашмаси қазиб олиниши оқибатида табиатга 273,8 млрд сўм зарар етказилгани ҳақида хабар берилганди.
Изоҳ (0)