Рақобатни ривожлантириш ва истеъмолчилар ҳуқуқларини ҳимоя қилиш қўмитаси умра хизматларини лицензиясиз реклама қилган 7 та туроператор жаримага тортилганини маълум қилди.
Туроператорлар томонидан умра тадбирини ташкил этиш ва ўтказишга оид рекламаларнинг қонунийлиги ўрганилган. Унинг натижасига кўра Наманган, Навоий, Фарғона, Хоразм, Тошкент вилоятлари ва Тошкент шаҳар ҳудудий бошқармалари томонидан лицензия ҳужжатлари мавжуд бўлмаган ҳолда рекламалар жойлаштирган жами 7 та туроператорга нисбатан “Реклама тўғрисида”ги қонун талаблари бузилиши аломатлари билан ишлар қўзғатилиб, ишни кўриб чиқиш якунлари юзасидан молиявий жарималар қўлланилган.
Улар: Emir Voyage, Makan United Travel Group, Ezofayz, Murabbiy Travel, Zaytun Tourism, Smrt Systems Company, Nazir Travel N1 МЧЖлар.
Шунингдек, қўмитанинг Наманган ва Фарғона вилоятлари ҳудудий бошқармалари томонидан жами 5 та туроператор мансабдор шахслари ҳамда Telegram каналлар админлари юқоридаги каби қонунчилик талаблари бузилиши юзасидан маъмурий жавобгарликка тортилган.
Лицензияга эга бўлмасдан реклама материаллари тарқатаётган 12 дан ортиқ ахборот ресурсини юритувчи шахсларга аниқлик киритиш мақсадида Киберхавфсизлик марказига мурожаат қилинган.
“Ҳурматли фуқаролар, умра тадбирларни амалга оширишда фирибгарларга алданиб қолишдан огоҳ бўлиш ва кейинчалик турли кўнгилсиз ҳолатларга тушиб қолмаслик мақсадида хавфсиз, ишончли ва кафолатланган хизматлардан ҳамда тегишли лицензияга эга бўлган туроператорлар хизматидан фойдаланишни тавсия этамиз”, дейилади қўмита хабарида.
Рақобатни ривожлантириш ва истеъмолчилар ҳуқуқларини ҳимоя қилиш қўмитаси нотўғри, ишончсиз ва шубҳали реклама ахборотлари берилган ҳолатлар кузатилса ёки бундай ахборот туфайли зарар кўрган фуқароларни ягона ишонч (1159) рақамига мурожаат қилишни сўради.
Дин ишлари бўйича қўмита Ўзбекистонда сўнгги икки ойда ўтказилган текширувларга кўра, умра лицензиясига эга бўлмасдан ушбу хизматни кўрсатаётган 31 та сайёҳлик фирмаси масъулларига нисбатан жиноят иши қўзғатилганини маълум қилганди. Ушбу қўмита ҳам ноқонуний турфирма ёки турагентлардан огоҳ бўлишга чақирганди.
Ўзбекистонда умра тадбирларини ташкил этиш
2024 йил июлида Ўзбекистонда умра тадбирларини ташкил этиш ва ўтказиш лицензияланадиган фаолиятнинг алоҳида тури сифатида белгиланди. Ҳукумат қарори билан қуйидаги лицензия талаб ва шартлари жорий этилган. Лицензияга эга бўлмаган тадбиркорлик субъектлари томонидан умра хизматларини кўрсатганлик учун юридик шахсларга солинадиган жарималар миқдорлари БҲМнинг 200 баравари (75 миллион сўм) этиб белгиланган.
Изоҳ (0)