Хитойнинг Хубэй провинциясида сув тошқини 21 кишининг ҳаётига зомин бўлди, деб хабар бермоқда Global Times. Таъкидланишича, Люлинь шаҳрида сув сатҳи 5 метргача кўтарилган.
Люлиндаги ёғингарчилик миқдори соатига 100 миллиметрдан ошган. Провинция метеорология хизмати хабарига кўра, кучли ёмғир 13 августгача давом этади.
Шунингдек, Туркияда кучли сув тошқинлари ва кўчкилар оқибатида камида 27 киши ҳалок бўлди. 13 август куни Туркия фавқулодда вазиятлар бошқармаси бир кечада яна 10 кишининг жасади топилганини маълум қилди. Шу тариқа Туркиянинг Қора денгиз соҳилидаги тошқин қурбонлари сони 27 кишига етган.
Хабарларга кўра, Кастамону вилоятида 25 киши, Синоп вилоятида яна икки киши ҳалок бўлган. Бартин вилоятида бир кишининг ҳалигача дараги топилмаган.
Тошқиндан зарар кўрган ҳудудлардан вертолётлар ва қайиқлар ёрдамида 1,7 мингдан ортиқ одам эвакуация қилинган.
Сув тошқини Туркия инфратузилмасига зарар етказди, 330 га яқин қишлоқ электрсиз қолди. Бешта кўприк қулаб тушган, кўпчилигига шикаст етган. Сув тошқинидан зарар кўрган ҳудудларда кўп сонли уйлар ва корхоналар сув остида қолган. Йўлларнинг бир қисми ювилиб кетган.
Июль ойининг иккинчи ярмида ҳам Туркияда сув тошқини юз берганди. Мамлакат шимоли-шарқидаги Ризо ва Артвин вилоятларида кучли ёмғирлар туфайли сув тошқинлари келиб чиққан.
Июль охирида Туркия жанубида иссиқ ва қуруқ ҳаво шароитида ўрмон ёнғинлари бошланди. Ҳукумат тақдим этган сўнгги маълумотларга кўра, Анталия вилоятидаги Манавгат курорт шаҳрида етти киши ёнғин қурбони бўлган. Мармарисда яна бир киши ҳалок бўлган. Жабрланганларнинг умумий сони 864 кишига етди.
Изоҳ (0)