Россия ва Ўзбекистон трансафғон темирйўли лойиҳасини бошлаш тўғрисида ҳужжат имзолади. Бу ҳақда Россия Транспорт вазирлиги хабар берди.
Унга кўра, ҳужжат Россия ва Ўзбекистон Транспорт вазирликлари ҳамда “Россия темир йўллари” ва “Ўзбекистон темир йўллари” ўртасида имзоланган. Россиянинг ихтисослаштирилган лойиҳа ташкилотлари 2025 йилда ўзбекистонлик ҳамкасблари билан биргаликда трансафғон темирйўли қурилиши лойиҳасининг техник-иқтисодий асослаш бўлимларини келишилган йўналишлар бўйича, шу жумладан, юк оқимлари ҳажми прогнози ва иқтисодий самарадорлигини аниқлаш бўйича тайёрлашни таъминлайди.
Иккита йўналиш белгилаб олингани маълум қилинди. Булар Мозори Шариф—Ҳирот—Дилором—Қандаҳор—Чаман ва Термиз—Наибобод—Лугар—Харлачи.
Бундан аввал Ўзбекистон ва Афғонистон Ҳайратон—Мозори Шариф темирйўлидан фойдаланиш бўйича шартномани узайтирган эди.
Евросиё тараққиёт банки таҳлилчилари Ўзбекистон, Афғонистон ва Покистон темирйўл тармоқларини боғлайдиган трансафғон коридорини қуриш истиқболларини баҳолаган эди. Лойиҳанинг режалаштирилган қиймати 4,8 миллиард долларни ташкил этади.
Изоҳ (1)
Daryo kiberxujumga uchragan