Ҳиндистонлик амалдор аэропорт ходимлари билан муштлашиб, ортиқча юк учун пул тўлашдан бош тортди ва уларнинг суякларини синдирди. Бу ҳақда Times of India хабар бермоқда.
Маълум қилинишича, армия амалдори Сринагар аэропортида SpiceJet авиакомпанияси ходимларига шафқатсизларча ҳужум қилганидан сўнг катта шов-шув кўтарилган. Маҳаллий оммавий ахборот воситалари маълумотларига кўра, можаро юкнинг оғирлиги туфайли келиб чиққан. Зобит Ритеш Кумар Сингҳ рухсат этилган меъёрдан анча оғир бўлган қўл юкини олиб кетмоқчи бўлган. Аэропорт ходимлари ортиқча юк учун тўлов талаб қилганда, у рад этиб, рўйхатдан ўтиш жараёнини якунламасдан самолётга ўтишга уринган. Ходимлар уни тўхтатмоқчи бўлганида Сингҳ тўрт кишига ҳужум қилган.
Оқибатда ходимлардан бирининг умуртқа поғонаси синиб, жағ суяги жиддий шикастланган. Яна бир жабрланувчининг юзига тепгач, бурни ва оғзидан қон оқа бошлаган. Қўриқчилар ва полициянинг тажовузкор йўловчини тўхтатиш уринишлари натижасиз қолган — у полиция аралашганидан кейин ҳам ҳужумни давом эттирган.
Ритеш ўзи эса SpiceJet ходимлари томонидан қилинган провокация қурбони бўлганини айтиб, полицияга қарши шикоят берган. Шу орада авиакомпания ҳодиса видеоёзувини тақдим этиб, йўловчини “қора рўйхат”га киритиш жараёнини бошлаган.
Ҳиндистон Мудофаа вазирлиги вакиллари вазиятни синчковлик билан ўрганиб чиқишини ва текширув натижаларига кўра чора кўришини маълум қилган. Армия қўмондонлиги ўз баёнотида барча айбловларга жиддий муносабатда эканлигини ва интизомнинг юқори меъёрларига қатъий риоя қилишини таъкидлаган.
Изоҳ (0)