Афғонистон томони билан олиб борилган музокаралар натижасига кўра, Ўзбекистон юк ташувчилари учун Афғонистонда ундириладиган йиғим миқдори камайтирилди. Бу ҳақда Транспорт вазирлиги матбуот хизмати хабар берди.
Қайд этилишича, ўзбек ҳайдовчиларидан мамлакат ҳудудида ундириладиган йиғимлар 6 500 афғони миқдорида (тахминан 99 доллар) камайтирилди.
Жумладан, Амударё кўпригидан ўтиш учун аввал 12 000 афғони (тахминан 182 доллар) миқдорида ундириладиган йиғим 28 сентябрдан 7 000 афғони (тахминан 106 доллар) этиб белгиланди. Афғонистонга юк автотранспорт воситасини кириши учун аввал 5 000 афғони (тахминан 76 доллар) миқдорида ундириладиган йиғим эса 3 500 афғони (тахминан 53 доллар) этиб белгиланди.
Транспорт вазирлиги Трансафғон мултимодал транспорт йўлаги орқали юк ташувларига қулай шароитлар яратиш, ундириладиган йиғимлар миқдорини оптималлаштириш бўйича ишлар давом эттирилаётганини билдирди.
Изоҳ (0)