Англиянинг “Манчестер Юнайтед” клуби “Реал Мадрид” ҳужумчиси Винисиус Жуниорни ўз сафига қўшиб олишни истамоқда. Fichajes нашри хабарига кўра, манкунианликлар бразилиялик футболчи учун 200 миллион евролик таклиф тайёрламоқда.
Манбага кўра, “қизил иблислар” дастлаб словениялик ҳужумчи Бенямин Шешкони харид қилишни режалаштирган эди. Бироқ футболчи “Ньюкасл”га ўтишни истамоқда. Шу сабабли, “Олд Траффорд” эгалари Винисиус трансферини амалга оширишга ҳаракат қилмоқчи. Ҳозирда “Манчестер Юнайтед” раҳбарияти футболчининг атрофидаги вазиятни диққат билан кузатиб турибди.
Винисиус Жуниорнинг “Реал Мадрид” билан шартномаси 2027 йилгача амал қилади. Бироқ футболчи клубдаги энг кўп маош оладиган ўйинчига айланишни истамоқда. Мадрид клуби эса унинг талабларини қондирмоқчи эмас. Натижада, клуб раҳбарияти ва футболчи ўртасидаги музокаралар вақтинча тўхтаб қолган.
Айни пайтда на “Реал Мадрид”, на футболчининг агенти бу хабарлар юзасидан расмий баёнот берган. Агар музокаралар ижобий якун топмаса, Винисиуснинг трансферга қўйилиш эҳтимоли юқори. “Манчестер Юнайтед” эса бундай вазиятдан унумли фойдаланишни режалаштирмоқда. Клуб бразилиялик ҳужумчини янги лойиҳанинг асосий фигураларидан бирига айлантиришни хоҳламоқда.
Маълумот учун, 25 ёшли ҳужумчи ўтган мавсум “Реал Мадрид” сафида жами 58 та ўйинда майдонга тушиб, ўз ҳисобига 22 та гол ва 19 та голли узатма ёздириб қўйган. Transfermarkt портали футболчининг қийматини 170 миллион еврога баҳоламоқда.
Изоҳ (0)