Очарчилик шароитида яшаётган Ғазо аҳолиси учун Кипрдан 1 май куни 400 тонна ҳажмида озиқ-овқат ёрдами жўнатилди. Бу ҳақда CNN нашри хабар берди.
Манбада айтилишича, Женнифер деб номланган кема 1 май куни тонгида Кипрнинг Ларнака портидан Ғазога жўнатилган. Гуманитар ёрдам юклари Исроилнинг Ашдод портига юборилган. Портлар орасидаги масофа 25-30 соатда босиб ўтилиши айтилган.
Ашдод портида қабул қилинган юклар қуруқлик орқали Ғазо шимолига олиб кирилиши хабар қилинган. Ҳозирда Ғазо шимолидаги ўтказув пункти орқали юк машиналари узлуксиз қатнаётгани маълум қилинган.
АҚШнинг Яқин Шарқдаги қочқинларга ёрдам кўрсатиш бирлашмаси (АNERА) раиси Моҳенад Итайимнинг CNN телеканалига маълум қилишича, 400 тонналик ёрдам Ашдод портида Исроил хавфсизлик хизмати қўлига ўтиши белгиланган. Юклар Керем Шалом чегара пункти орқали гуманитар ҳалокат нуқтасига олиб кирилиши билдирилган.
Бирлашган Араб Амирликлари расмийлари ҳам эндиликда Ашдод порти орқали гуманитар ёрдам етказиш дастурида қатнашишларини маълум қилган.
Яқин Шарқ нашрлари Қўшма Штатлар томонидан Ғазога инсонпарварлик ёрдамини етказишга имкон берадиган кўчма порт қурилиши давом этаётганини маълум қилган. У тайёр бўлгач Кипрдан ва бошқа ҳудудлардан келадиган ёрдамлар тўғридан тўғри Ғазо секторида қабул қилиб олиниши белгиланган.
Маълумотларга кўра, ҳозирда Ғазо секторида 2,2 миллион киши истиқомат қилмоқда. Ушбу аҳолининг ярмига яқини очлик даражасида яшамоқда.
Изоҳ (0)