Эрон президенти Иброҳим Раисий расмий ташриф билан Дамашққа келди. Бу ҳақда SANA ахборот агентлиги хабар берди.
Эрон раҳбари Сурия президенти Башар ал-Асад билан батафсил музокараларни ўтказиш ниятида. Бу Раисийнинг сўнгги 13 йил ичида Сурияга илк ташрифи ҳисобланади. Қайд этилишича, Эрон раҳбарига ташқи ишлар вазири Ҳусайн Амир Абдуллахиён, мудофаа вазири Муҳаммад Ризо Аштианий ва нефть вазири Жавад Оужи ҳам ҳамроҳлик қилмоқда.
Томонлар ўртасидаги музокаралар савдо-иқтисодий ҳамкорлик масалаларига қаратилади. Эронлик сиёсатчининг ташрифи чоғида йирик ҳужжатлар тўплами имзоланади.
Эрон президентининг Сурияга ташрифи Араб—Исроил конфликтининг навбатдаги кескинлашуви фонида ўтмоқда
Сешанба куни Исроил ҳарбий-ҳаво кучлари самолётлари Сурия армиясининг Ҳалаб шаҳри яқинидаги позицияларига ракета зарбалари берди.
Ҳужумни қайтаришда бир суриялик аскар ҳалок бўлди, яна етти нафари яраланди. Бундан ташқари, Нейраб халқаро аеропортидаги учиш-қўниш йўлаги ҳам ҳужум оқибатида шикастланган.
Шу куни Исроил қамоқхонасида очлик эълон қилган фаластинлик фаол Хадр Аднан ўлимидан сўнг Ғазо секторидан Исроилга 70 дан ортиқ ракета учирилди. Бунга жавобан Исроил армияси Фаластиндаги Ҳамас ҳаракатининг ҳарбий нишонларига икки марта ҳужум уюштирган.
Изоҳ (0)