Германия Ҳарбий-ҳаво кучлари (ҲҲK) қирувчи самолётлари Болтиқ денгизи устида номаълум самолётни кузатиб борди. Бу ҳақда Германия мудофаа вазирлиги расмий вакили Натали Йенинг маълум қилди.
“Тасдиқлашим мумкинки, кеча Германия ҲҲK самолётлари айнан номаълум самолёт Болтиқ денгизи устидаги халқаро ҳаво ҳудудида парвоз режасисиз ва транспондер сигналисиз учгани сабабли ҳавога кўтарилди”, деди вазирлик вакили.
Йенинг қўшимча қилишича, самолёт аниқлангач, немис Eurofighterʼлари уни идентификация қилган ва шундан сўнг кузатиб борган. Германия мудофаа вазирлиги вакилининг сўзларига кўра, ҳаво кемаси НАТО ёки Германия ҳаво ҳудудидан учиб ўтмаган.
Бир кун аввал Bild газетаси Болтиқ денгизидаги Рюген ороли шарқида Россиянинг Ил-20М самолёти пайдо бўлгани сабабли Шимолий Атлантика альянси қирувчи самолётлари осмонга кўтарилгани ҳақида хабар берган. Муаллифлар қўшимча қилишича, ҳаво кемаси гўё радиоалоқага чиқмаган ва транспондерлар ўчирилган ҳолда ҳаракат қилган.
Бундан олдин россиялик дипломат Россиянинг Болтиқ денгизи минтақасида НАТОга қандай қаршилик кўрсатиши ҳақида маълумот берганди.
Изоҳ (0)