Ғазонинг ҲАМАС ҳаракати томонидан 2023 йил 7 октябрь куни Исроилга амалга оширилган ҳужумда омон қолганлар ва ҳалок бўлганларнинг қариндошлари Meta компаниясини судга берди. Бу ҳақда Arab News хабар берди.
Даъво қилинишича, компаниянинг Instagram ва Facebook ижтимоий тармоқлари ўша кунги ҳужумни жонли эфирга узатган. Бу даъво Тель-Авив округ судига топширилган бўлиб, унда тармоқлар “зўравонликни жонли эфирда намойиш этиш воситасига айлангани” учун айбланмоқда. Жавобгар сифатида тилга олинган Metaъдан 4 миллиард шекел (тахминан 1,17 миллиард доллар) миқдорида товон пули талаб қилинган. Бу маблағлардан ҳар бир жабрланганлар учун 200 минг шекел, ҳар бир исроиллик учун эса 20 минг шекел ажратилиши кўзда тутилган.
Даъвогарларнинг айтишича, ушбу контентлар ўз вақтида ўчирилмаган ва улар ҳалигача ижтимоий тармоқларда мавжуд. Аризада Идан оиласининг ҳикояси ҳам келтирилган. Хусусан, ҲАМАС жангарилари уларнинг уйига бостириб кириб, гаровга олган. Оиланинг тўнғич қиз фарзанди Майян эса ҳарбийлар томонидан ўлдирилган. Юқоридаги воқеаларнинг барчаси ҳаракат томонидан Facebook’да жонли эфирга узатилган. Оиланинг отаси Сачи эса Ғазога ўғирлаб кетилган ва кейинчалик ўлдирилган.
“Улар қизимизнинг ўлдирилиши, бошқа болаларимизнинг жароҳатланиши ва ёрдам сўраб йиғлашимизни жонли эфирга узатди. Facebook ва Instagram шафқатсиз террор ҳужумини трансляция қилиш имконини берди. Meta эса ҳали ҳам бу тасвирларни олиб ташламаган”, дея онанинг сўзларидан иқтибос келтирилган.
Meta компанияси ўз навбатида, воқеадан жабр кўрган оилаларга ҳамдардлик билдириб, контентни ўчириш учун махсус жамоа вакиллари кеча-ю кундуз ишлаётганини маълум қилган. Бу суд иши Исроил ва АҚШда ҲАМАС’га ёрдам берганликда айбланаётган шахслар ёки ташкилотларга қарши очилган бир неча суд ишлари сирасига киради.
Изоҳ (0)