UFC’нинг ўрта вазн тоифасида (-84 кг) жанг қиладиган, ҳали бирор марта мағлубият нималигини билмай келаётган россиялик спортчи Ҳамзат Чимаев ўзини икки вазн тоифасидаги собиқ чемпион Конор Макгрегор билан таққослашларига муносабат билдирди.
Мен ва у бутунлай бошқа жангчилармиз. Конор кўпроқ рақибга зарба бериш орқали ғалаба қозонади. Унинг бокси яхши, айниқса, қарши ҳужумда кучли. Аммо бошқа томонлама у кучсизроқ. Балки мен ҳам шунга ўхшаш тарзда чемпионлик камарини қўлга киритарман. Сабаби мен ҳам “стойка”да ёмон жанг қилмайман. Ҳар нарса бўлиши мумкин. Камар учун бўладиган жанг қандай кечишини олдиндан айта олмайман, — деди Чимаев ESPN телеканалига берган интервьюсида.
Эслатиб ўтамиз, Ҳамзат Чимаев навбатдаги жангини ўрта вазн тоифасидаги амалдаги чемпион, жанубий африкалик Дрикус дю Плессига қарши ўтказади. Мазкур жанг 17 август куни АҚШнинг Чикаго шаҳрида бўлиб ўтадиган UFC 319 турнирининг асосий баҳси бўлиши кутилмоқда.
Маълумот учун, Чимаев охирги жангини 2024 йил 26-октябрь куни Абу-Дабида ўтган UFC 308 турнирида Роберт Уиттакерга қарши ўтказиб, ғалаба қозонган эди.
Изоҳ (0)