Вьетнам АҚШ президенти Дональд Трамп маъмурияти томонидан Вьетнам товарларига божхона тўловларини жорий этиш хавфини камайтириш мақсадида мамлакат бош вазири ўринбосари Хо Дик Фок бошчилигидаги юқори мартабали делегацияни АҚШга юбормоқда. Бу ҳақда Bloomberg ахборот агентлиги хабар бермоқда.
АҚШ оммавий ахборот воситалари сўнгги пайтларда Вашингтон икки мамлакат ўртасидаги савдо айланмасида Вьетнам фойдасига сезиларли номутаносиблик туфайли Вьетнам товарларига юқори импорт божларини жорий этиши мумкинлиги ҳақида бир неча бор хабар берган.
“Бош вазир ўринбосари Хо Дик Фок Vietnam Airlines, Vietjet Aviation вa VinaCapital Group каби компаниялар раҳбарлари ҳамроҳлигида Нью Йоркдаги ишбилармонлик учрашувида иштирок этади”, дейилади агентликнинг кун тартиби ҳақидаги маълумотга асосланган хабарида.
Таъкидланишича, Вьетнам делегацияси Америка Boeing компанияси ҳамда Америка банклари вакиллари билан ҳам учрашади.
Агентлик маълумотларига кўра, делегациянинг юборилиши Вьетнамнинг АҚШ билан савдо айланмасидаги катта тафовутни камайтириш ниятини билдиради. Ҳозирда Вьетнам товарларининг АҚШга экспорти ҳажми Америка маҳсулотларининг Вьетнамга импортидан сезиларли даражада юқори.
“Вьетнам дунёдаги савдога энг кўп боғлиқ давлатлар қаторига киради ва АҚШни ўзининг энг муҳим савдо ҳамкори деб ҳисоблайди”, дея таъкидлайди Bloomberg.
Февраль ойида АҚШ президенти Дональд Трамп мамлакатга чет элдан киритиладиган барча пўлат ва алюминий маҳсулотларига 25 фоизлик божхона тўловларини жорий этишини эълон қилган эди. Март ойида эса Трамп чет элда ишлаб чиқарилган автомобиллар учун 25 фоизлик янги бож 2 апрелдан кучга киришини маълум қилганди.
Изоҳ (0)