АҚШда демократ сенатор Кори Букер президент Дональд Трампнинг сиёсатини 25 соатдан ортиқ танқид қилиб, энг узун нутқ рекордини ўрнатди. Бу ҳақда CNN хабар берди.
Букер ўз нутқида АҚШ президентининг илк фармонлари, Гренландия ва Канадани қўшиб олишга интилишлари оқибати ҳақида гапирган. Демократ шу тариқа 1957 йилда 24 соат-у 18 дақиқа нутқ сўзлаган марҳум ҳамкасби Стром Термонднинг рекордини янгилаган. Букер баёнотини жисмоний имконияти борича давом эттиришга ваъда берган.
У “мамлакат инқирозда” экани ҳақида огоҳлантирган, АҚШ ҳукумати самарадорлик департаменти (DOGE) раҳбари, миллиардер Илон Маскнинг федерал ҳокимият кўламини қайта кўриб чиқиш бўйича саъй-ҳаракатларини танқид қилган. Шунингдек, миллионлаб америкаликлар учун асосий соғлиқни сақлаш дастурлари қисқартирилиши мумкинлиги ҳақида огоҳлантирган.
Қўшма Штатлар президенти атиги 71 кун ичида америкаликлар хавфсизлигига, молиявий барқарорликка ва демократиямизнинг асосий пойдеворларига шунчалик кўп зарар етказди. Ҳозир Америка учун одатий даврлар эмас. Шунинг учун АҚШ Сенатида бу ҳолат оддий деб қаралмаслиги керак, деди Букер .
У нутқига қандай тайёргарлик кўрганини ҳам сўзлаб берди. Демократнинг айтишича, ҳожатхонага қатнамаслик учун нутқ арафасида овқатланиш ва ичишни тўхтатган.
Енгишим керак бўлган энг қийин нарса шундаки, мушаклар тортиша бошлади ва вақти-вақти билан спазмлар ёки шунга ўхшаш нарсалар пайдо бўлди, деган у.
Изоҳ (0)