Қирғизистон парламенти депутати Дастан Бекешев қирғизистонликлар автомобилларининг ойналари қорайтирилган бўлса, Ўзбекистон ҳудудидан ўтиш учун 15 доллар тўлашга мажбур бўлаётганини маълум қилди. У Жогорку Кенеш мажлисида жавоб чораларини кўриш ёки йиғимни бекор қилишга эришишни таклиф этди.
Бекешев ташқи ишлар вазири Жеенбек Кулубаевга Қирғизистон фуқаролари Жалолобод вилоятидан Боткенга бориш ва қайтиш учун Ўзбекистон ҳудудидан ўтишга мажбур эканликларини, қўшни давлат эса автомобилнинг орқа ойналари қорайтирилган бўлса, қирғизистонликлардан 15 доллардан йиғаётганини маълум қилди.
“Ҳар бир машина. Деярли ҳар куни. Биз эса улардан (йиғим) олмаймиз”, деди у.
Депутатнинг сўзларига кўра, Ўзбекистон томони ҳатто Қирғизистоннинг бир банк иловасидан фойдаланмоқда, бу эса ватандошларимизга йиғимни тўлашда қулайлик яратади. Депутат вазирдан ўзбек автомобиллари учун худди шундай йиғимларни жорий этишни ёки қўшни давлат билан қирғизистонликлар уларнинг ҳудудида бу йиғимни тўламаслиги ҳақида келишиб олишни сўради.
Ташқи ишлар вазири Жеенбек Кулубаев бу масала илгари кўтарилмаганини айтиб, вазиятни ўрганиб чиқишга ваъда берди.
“Биз бу масалани тенг ҳуқуқлилик асосида кўтаришимиз ва ҳукуматлараро комиссия йиғилишида муҳокама қилишимиз мумкин”, деган вазир.
Маълумот учун, Ўзбекистон Вазирлар Маҳкамасининг 2018 йил 18 июлдаги “Тонировкали (қорайтирилган) ойнали автотранспорт воситаларидан фойдаланишни тартибга солиш чора-тадбирлари тўғрисида”ги қарорига кўра, хорижий давлатларнинг тонировкали (қорайтирилган) ойнали енгил автотранспорт воситаларининг Ўзбекистон ҳудудига вақтинча кириши ва транзити учун давлат бюджетига тушадиган 15 АҚШ доллари миқдорида йиғим ундирилади.
Қирғизистонда автомобилларни тонировка қилиш учун рухсатнома олиш йиғими жисмоний шахслар учун йилига 50 минг сом (7,44 миллион сўм), юридик шахслар учун эса 70 минг сом (10,4 миллион сўм)ни ташкил этади.
Изоҳ (0)