НАТО Совуқ урушдан бери “энг катта капитал таъмирлаш” билан шуғулланмоқда. Альянс захирадаги қўшинларни чегарадош мамлакатларга тезроқ жойлаштиришга тайёрламоқда. Бу ҳақда The Washington Post хабар берди.
Россиянинг Украинага кенг кўламли ҳужуми ортидан НАТО яна тўртта давлатда: Болгария, Венгрия, Руминия ва Словакияда жанговар гуруҳлар ташкил этиш орқали ўзининг шарқий қанотини қисман мустаҳкамлади. НАТО матбуот котиби Оана Лунжескунинг сўзларига кўра, ҳозирда саккизта жанговар гуруҳда 10 мингга яқин аскар жойлаштирилган, уларнинг аввалги сони 5 мингни ташкил қилган.
Шунингдек, альянснинг шарқий қисмига яна ўнлаб кемалар ва юзлаб самолётлар жўнатилган. Эстония бош вазири Кая Каллас Россияга НАТО бостириб киришга тайёр экани ҳақида жуда аниқ сигнал бериш кераклигини айтган.
АҚШ армиясининг истеъфодаги генерал-лейтенанти Бен Ходжснинг айтишича, вазият аввалгидан яхшиланган бўлса-да, қўшинларнинг сафарбарлиги катта муаммо бўлиб қолмоқда.
Литвада жанговар гуруҳга бошчилик қилаётган Германия у ерда доимий бригада ташкил этилишига қарши. Берлин немис базаларида заҳира кучларини сақлаш мақсадга мувофиқ, деб ҳисоблайди.
Литва расмийлари Россияга яқинлиги сабабли эътироз билдирмоқда, чунки иттифоқчи қўшинлар ўз вақтида етиб келмаса, бу мамлакатни НАТОнинг бошқа аскарларидан узиб қўйиши мумкин. Тез мустаҳкамланиш режаси эса ишлаб чиқиш жараёнида.
Журналистларнинг фикрича, Марказий ва Шарқий Европа давлатлари Россиядан келаётган таҳдидни реал ва экзистенсиал деб ҳисоблайди.
“Менимча, Россия НАТО билан тўқнашув ёки уруш йўлида”, — дейди Чехия Бош штаб бошлиғи, генерал Карел Rexка.
Унинг сўзларига кўра, НАТО Россия билан жанг қилмоқчи эмас.
“Аммо бу содир бўлмаслигини англатмайди. Кўп урушлар бўлганки, уларни ҳеч ким режалаштирмаган”, — дея хулоса қилди генерал.
Изоҳ (0)