Литва президенти Гитанас Науседа НАТО 1997 йилда имзоланган Россия билан муносабатлар ва ҳамкорлик тўғрисидаги актни бекор қилиши кераклигини айтди. Ушбу акт Россия билан чегарада доимий ҳарбий базалар қуришни тақиқлайди.
“Россия Беларусда тактик ядро қуролини жойлаштириш бўйича фаол қадамлар қўйган пайтда — буни исботловчи далиллар бор — биз узил-кесил Россия—НАТО таъсис актини ўлик, деб эълон қилишимиз керак”, — деди Науседа The Times нашрига.
Унинг фикрича, бу акт амалда экан, Европа пойтахтларининг ҳушёр фикрлашига халал беради ва уларни стратегик ноаниқлик зонасида ушлаб туради.
The Times таъкидлаганидек, НАТО халқаро кучлари Польша ва Болтиқбўйи давлатлари сингари тўққизта мамлакатда жойлашган. Бироқ улар ротатация бўйича ишлайди ва кўпинча олти ойдан сўнг бошқа мамлакатга олиб кетилади, чунки Россия билан ҳамкорлик шартномаси собиқ шарқий блокнинг катта қисмида доимий базалар ўрнатишни тақиқлайди.
Науседа Украинанинг НАТОдаги истиқболлари ҳақида ҳам фикр билдирди. Унинг айтишича, 2008 йилда Бухарестдаги саммит якунларида айтилган сўзларни Вилнюсдаги саммитда такрорлаш хато бўлади. Литва президентининг фикрича, “Украинага альянсга кириш учун энг аниқ ва қисқа йўл”ни белгилаш зарур, чунки бу Украина армиясининг руҳини кўтаради. У Украинанинг “уруш ҳолатида” НАТОга аъзо бўлиши мумкин эмаслигини тан олди, аммо урушдан кейинги ҳаракатлар бўйича аниқ сигналлар бериш кераклигини таъкидлади.
Эслатиб ўтамиз, 2022 йилда Литва президенти Гитанас Науседа Америка қўшинларини мамлакатда доимий равишда жойлаштириш илтимоси билан АҚШ расмийларига мурожаат қилмоқчи эканини, шунингдек, Литвада хорижий ҳарбий контингентни кўпайтириш бўйича Германия билан музокаралар олиб боришини айтганди.
Изоҳ (0)