Хитой АҚШга қарши туришга мўлжалланган ядро арсеналини қурмоқда. Энг муҳими, бу Россия-Украина уруши тажрибасини ҳисобга олган ҳолда амалга оширилмоқда, деб ёзади Тhе New York Times.
Хабарга кўра, Си Цзиньпин ҳукмронлигининг дастлабки кунлариданоқ ядро қуролига таянган. Хитой “тахтига” кўтарилганидан уч ҳафта ўтмай у ядровий ракеталар бўйича масъул генералларни йиғиб, кескин талаб қўйган: Хитой “даҳшатли душман” билан юзага келиши мумкин бўлган ядровий тўқнашувга тайёр бўлиши керак.
Си жанобларининг ядровий масалалар бўйича оммавий баёнотлари шаблонли эди. Аммо унинг ёпиқ эшиклар ортидаги изоҳлари хавотир ва амбиция Хитойнинг сўнгги ўн йил ичида ўз ядровий қуроллари арсеналини ўзгартиришга мажбур қилганини кўрсатади, — деб ёзади NYT.
Энди Хитойнинг ядровий салоҳияти ошгани сабабли, унинг ҳарбий стратеглари ядро қуролига нафақат мудофаа қалқони, балки душманларни қўрқитиш ва бўйсундириш учун потенциал қилич сифатида қарайди.
NYT таъкидлашича, ҳатто ядро қуролидан фойдаланмаса ҳам, Хитой бошқа мамлакатларни Пекин иродасига қатъий қаршилик кўрсатишдан огоҳлантириш учун “ўз ракеталарини жалб қилиши” мумкин.
Кучли стратегик тўхтатувчи восита уруш бошланмасдан душманни шошилинч ҳаракатлардан чекинишга мажбур қилиши мумкин. Ким илғор технологияга эга бўлса ва чангни ортда қолдирадиган стратегик тўхтатувчи қуролларни ишлаб чиқса, у тинчлик даврида кучли овозга эга бўлади ва уруш пайтида ташаббускор бўлади, — деб ёзган 2001 йилда Хитой Миллий мудофаа университети тадқиқотчиси Чэн Сзянзи.
Си Цзиньпин 2012—2013 йиллар охирида ҳокимият тепасига келганидан бери Хитой ядро арсеналини икки баробарга ошириб, уни 500 га яқин каллакка етказди. Бу суръатда Пекинда 2035 йилга бориб 1500 га яқин жанговар каллаклар бўлади, буни АҚШ ва Россиянинг ядровий арсеналлари билан солиштириш мумкин.
Муҳими, Хитойнинг ўсиб бораётган ядровий салоҳияти Тайваннинг келажагини белгилаши мумкин. Яқин йилларда Пекин Вашингтон ва унинг иттифоқчиларининг орол юзасидан ҳар қандай можарога аралашувини чеклай олишига ишонч ҳосил қилиши мумкин.
Буни қўллаб-қувватлашда хитойлик ҳарбий таҳлилчилар Европа ва АҚШни урушда Украинани фаолроқ қўллаб-қувватлашдан қайтариш учун Ғарбни ядровий эскалация билан муваффақиятли шантаж қилган Кремль мисолини келтиргани эътиборга молик, — дейилади хабарда.
Изоҳ (0)