Арманистон бош вазири Никол Пашинян Россия базаларининг Арманистон ҳудудида қолаётганидан ҳеч қандай фойда кўрмаётганини айтди. Бу ҳақда у The Wall Street Journal нашрига берган интервьюсида гапирди.
“Қорабоғдаги можаро Москва ўзининг иттифоқчилик мажбуриятларини бажара олмаслигини кўрсатди”, — деди Пашинян. “Бу воқеалар бизни моҳиятан хавфсизлик бўйича муносабатларимизни диверсификация қилишимиз керак деган қарорга олиб келди ва энди шунга ҳаракат қиляпмиз”.
Шу билан бирга, журналистнинг Арманистон Россиядан қўшинларини олиб чиқиб кетишни талаб қиладими, деган саволига Пашинян шундай жавоб берди:
“Биз бундай саволни муҳокама қилмаяпмиз. Ҳозир бошқа масалаларни кўпроқ гаплашяпмиз, бу ҳолатнинг сабабини тушунишга ҳаракат қиляпмиз. Булар, албатта, Арманистон — Россия, Арманистон — КХШТ ўртасидаги ишчи музокараларнинг кун тартиби бўлади, деб ўйлайман”.
Россия билан иқтисодий ва ҳарбий ҳамкорликка эга Арманистон Озарбайжон Қорабоғни назоратига қайтарганидан кейин янги ҳамкорлар қидирмоқда, деб ёзади The Wall Street Journal.
Россия президенти матбуот котиби Дмитрий Песков Пашиняннинг сўзларига муносабат билдирар экан, у қандай контекстда гапирганини тушуниш зарурлигини айтди.
“У бу сўзларни айтганми йўқми, агар айтган бўлса, қаерда, қайси контекстда айтганини ҳали билмаймиз. Бизда бундай маълумотлар йўқ, The Wall Street Journal’ни эса асосий манба сифатида қабул қилолмаймиз”, — деди Песков “Интерфакс”га.
Россиянинг 102-ҳарбий базаси 1995 йилдан бери доимий равишда Арманистонда жойлашиб турибди. У 3 500 га яқин ҳарбий хизматчидан иборат.
Сентябрь ойи ўрталарида Озарбайжон тан олинмаган Қорабоғ Республикаси ҳудудида аксилтеррор операциясини ўтказиб, республика тугатилган пайтда Россия можарони ҳал қилишда ҳеч қандай тарзда иштирок этмади. Москва бу Озарбайжоннинг ички иши эканлигини, чунки жанглар бу давлатнинг халқаро миқёсда тан олинган ҳудудида олиб борилаётганини билдирди.
Изоҳ (0)