Ўзбекистоннинг Ўш шаҳридаги Бош консулхонаси томонидан вақтинча ишлаш учун хорижга чиқиб кетган ватандош хотин-қизларнинг ҳуқуқ ва қонуний манфаатларини ҳар томонлама ҳимоя қилиш бўйича тизимли ишлар амалга оширилмоқда. Бу ҳақда “Дунё” агентлиги хабар берди.
Хусусан, 2022 йилда Қирғизистонда вафот этган турмуш ўртоғининг ўлими тўғрисидаги гувоҳнома ва бошқа ҳужжатларини олиш учун Ўш вилоятига келиб, паспорти ва шахсий буюмларини йўқотган ҳамда пулсиз қийин аҳволда қолган 56 ёшли Ўзбекистон фуқароси Раънохон Раззоқовага консуллик-ҳуқуқий ёрдами кўрсатилган. Жумладан, унга ватанга қайтиш гувоҳномаси тўловсиз расмийлаштирилди ва Ўзбекистонга қайтишида амалий ёрдам берилган.
Бош консулхона маълумотига кўра, 2024 йилнинг бошидан буён 300 га яқин хотин-қизларга ва ўзбекистонлик талабаларга турли консуллик-ҳуқуқий ёрдам кўрсатилган. Мурожаатларнинг аксарияти хорижий мамлакат визасини расмийлаштириш, рўйхатдан ўтиш, Ватанга қайтиш гувоҳномаси олиш, шунингдек, оилавий-маиший муаммолар, фарзандлар ёки мол-мулкни тақсимлаш ва бошқа масалаларга оид бўлмоқда.
Бош консулхона ҳузурида консуллик округига кирувчи Ўш, Жалолобод ва Боткен вилоятларида меҳнат фаолиятини олиб бораётган ёки олий таълим муассасаларида таҳсил олаётган фаол, тадбиркор, ижодкор, ташаббускор хотин-қизлар, талаба ёшлардан иборат ишчи гуруҳ тузилган. Мазкур ишчи гуруҳ кўмагида турли байрам тадбирлари, давра суҳбатлари ва учрашувлар мунтазам равишда ўтказиб келинмоқда.
Бундан олдин Ташқи меҳнат миграцияси агентлиги Россияда қийин аҳволда қолган ўзбекистонлик ватанга қайтарилгани тўғрисида хабар берилганди.
Изоҳ (0)