Ўзбекистоннинг Истанбул шаҳридаги Бош консулхонаси Туркияга шартли кириш (şartli giriş) тартиби бекор қилинганини эълон қилди.
Маълум қилинишича, ушбу тартиб Туркия Миграция бошқармаси томонидан 2025 йил февраль ойидан бошлаб бекор қилинган. Норасмий маълумотларга кўра, 2025 йил февраль ойининг бошидан шу кунга қадар 150 дан ортиқ хорижий фуқаролар аэропортларда ушбу янги қоидалар ҳақида олдиндан хабардор бўлмагани сабабли муаммоларга дуч келди.
Нима ўзгарди?
Олдин Туркияда қонуний қолиш муддатини оширган ёки яшаш гувоҳномаси (ikamet izni) олиш бўйича рад жавоби олган хорижий фуқаролар мамлакатга шартли кириш (şаrtli giriş) орқали қайтиб келишлари ва 10 кун ичида янги ариза топширишлари мумкин эди. Энди бу имконият тўлиқ бекор қилинди. Ўз вақтида чиқиб кетмаган ёки яшаш гувоҳномаси олишда рад этилган фуқаролар дарҳол Туркияга қайтолмайди.
Янги қоидаларга мувофиқ, фуқароликка қараб Туркияга кириш тақиқи 3 ойдан 6 ойгача бўлиши мумкин. Шу муносабат билан Бош косулхона Туркияга келиш ниятида бўлган ватандошларни ушбу киритилган ўзгаришни инобатга олишга чақирди.
“Туркияга сафар қилишдан олдин мазкур давлат миграция қоидалари билан танишинг. Ҳужжатларингизда муаммо йўқлигига ишонч ҳосил қилинг”, дейилади Бош консулхона эслатмасида.
Бош консулхона агар қонуний қолиш муддати тугаган бўлса ёки яшаш гувоҳномаси (ikamet izni) олишда рад этилган бўлса, ушбу мамлакат қонунини ҳурмат қилган ҳолда тарк этишни сўради. Чунки бу турдаги қоидабузарликлар Туркияга қайтиш имкониятининг чеклаб қўйилишига сабаб бўлиши мумкин.
Изоҳ (0)