Истанбулдаги Ўзбекистон Бош консулхонаси фуқароларни аэропортларда бегоналарнинг юкларини олмасликка чақирди.
Қайд этилишича, Туркия ва Ўзбекистон ўртасидаги авиақатновлар давомида айрим шахслар аэропортларда ўз юкларини Ўзбекистонга етказиб беришни илтимос қилиши мумкин. Улар турли баҳоналар билан (масалан, оғир касал қариндоши борлиги ёки юкни жўнатиш имконияти йўқлиги) сизни ишонтиришга ҳаракат қилади.
“Бундай ваъдаларга ишонманг ва бегона юкни ҳеч қандай ҳолатда қабул қилманг”, дея огоҳлантирди Бош консулхона.
Маълум қилинишича, ўтган йилларда бир неча Ўзбекистон фуқаролари айнан шундай вазиятларга тушиб қолган ва ноқонуний юкларни, жумладан наркотик моддалар ва сохта ҳужжатларни билмасдан олиб ўтганлари учун ҳибсга олинган.
2023 йилда Истанбул аэропортида 27 ёшли Ўзбекистон фуқароси номаълум шахснинг илтимосига биноан юкни олиб ўтишга рози бўлган. Бироқ, чегарада текширув вақтида юк ичидан катта миқдорда наркотик моддалар топилган. Натижада у 10 йиллик қамоқ жазосига ҳукм қилинган.
2022 йилда Анталия шаҳридан Тошкентга қайтаётган яна бир фуқаро ўзига нотаниш кишининг юкини олиб ўтишга рози бўлган. Юк таркибида сохта паспорт ва ноқонуний ҳужжатлар борлиги аниқланиб, фуқаро бир неча йилга озодликдан маҳрум этилган.
Бош консулхона эҳтиётсизлик ёки бегоналарга бўлган ишонч оғир жиноий оқибатларга олиб келиши мумкинлигини билдириб, бегона одамларнинг юкини ҳеч қандай ҳолатда қабул қилмасликни сўради.
Бундан аввал Бош консулхона Туркиядаги ўзбекистонликларни ноқонуний миграцияга кўмаклашиш учун катта пул мукофоти ваъда қилаётган жиноий гуруҳлардан огоҳликка чақирганди. Туркияда ўзбекистонликлар виза билан боғлиқ фирибгарликка учраётганини ҳам маълум қилганди.
Изоҳ (0)